लसीकरणाच्या जनजागृतीसाठी चंद्रपूर मनपाची अनोखी शक्कल, दुकानाबाहेर ग्राहकांसाठी लावल्या पाट्या

कोरोनाविरुद्ध लढाईत सरकारी यंत्रणा लसीकरणावर भर देण्याचं आवाहन लोकांना करत आहेत. महाराष्ट्रात सध्या लसीकरणाने वेग घेतलेला असला तरीही काही भागांत नागरिकांध्ये लस घेण्याबाबत उदासिनता दिसून येत आहे. यावर चंद्रपूर महानगरपालिकेने एक नामी शक्कल लढवली आहे.

दुकानदार किंवा दुकानातील कामगारांनी लस घेतलेली नसेल तर मनपाचे अधिकारी दुकानाबाहेर बोर्ड लावून नागरिकांना सुचना देत आहेत.

या दुकानात काम करणाऱ्या लोकांनी अजुनही कोरोनाची प्रतिबंधक लस घेतली नाही. ग्राहकांनी याची नोंद घ्यावी आणि आपल्या जबाबदारीवर प्रवेश करावा असे बोर्ड चंद्रपुरातील दुकानाबाहेर लावण्यात आले आहेत. चंद्रपूर महानगरपालिकेचं एक पथक आज बाजारपेठेत जाऊन दुकानदार आणि काम करणाऱ्या कर्मचाऱ्यांच्या लसीकरणाची कागदपत्र तपासत होती. या तपासणीत ज्या दुकानदारांनी किंवा काम करणाऱ्या कर्मचाऱ्यांनी लस घेतली नाहीये त्या दुकानाबाहेर मनपा कर्मचारी ग्राहकांसाठी बोर्ड लावत आहेत.