यशवंत सिन्हांना पराभूत करत द्रौपदी मुर्मू बनल्या देशाच्या १५व्या राष्ट्रपती! २५ जुलैला शपथविधी

द्रौपदी मुर्मू यांचा राष्ट्रपतीपदाच्या निवडणुकीत दणदणीत विजय

संपूर्ण देशाचं लक्ष या निवडणुकीकडे लागलं होतं. राष्ट्रपतीपदाच्या निवडणुकीत द्रौपदी मुर्मू यांनी बाजी मारली आहे. द्रौपदी मुर्मू यांना ८१२ मतं मिळाली आहेत तर यशवंत सिन्हा ५२१ मतं मिळाली आहेत. राष्ट्रपती पदावर विराजमान होणाऱ्या त्या पहिल्या आदिवासी महिला असतील. द्रौपदी मुर्मू या २५ जुलैला शपथ घेतील. राष्ट्रपती रामनाथ कोविंद यांचा कार्यकाळ २४ जुलैला संपणार आहे.

कोण आहेत द्रौपदी मुर्मू?

द्रौपदी मुर्मू या ओदिशातील आदिवासी नेत्या आहेत. ओदिशातील भाजप-बीजेडी युती सरकारमध्ये २००२-२००४ काळात त्या मंत्रीही होत्या. त्यांनी झारखंडच्या नवव्या राज्यपाल म्हणूनही काम केलं आहे. द्रौपदी मुर्मू या ओदिशाच्या रायरंगपूर मतदारसंघातून आमदार म्हणून निवडून आल्या होत्या.

ओदिशाच्या आदिवासी कुटुंबात २० जून १९५८ ला द्रौपदी मुर्मू यांचा जन्म झाला. सुरूवातीला त्यांनी शिक्षिका म्हणून नोकरी केली. त्यानंतर त्या राजकारणात सक्रिय झाल्या. १९९७ मद्ये रायरंगपूर नगरपंचायतीत त्या नगरसेवक म्हणून त्या विजयी झाल्या. २००० ते २००९ या कालावधीत त्या ओदिशा विधानसभेत आमदार होत्या. २०१५ मध्ये त्यांची झारखंडच्या राज्यपाल म्हणून नियुक्ती करण्यात आली होती.