मुख्यमंत्री पदाच्या शर्यतीतील बळकट स्थान

या दौऱ्याचे राजकीय वेध घेता शिंदे यांनी आपली पारंपरिक 'मास लीडर' आणि 'ठाण्याचे भाई' ही प्रतिमा मागे टाकत स्वतःला एक सक्षम आणि दूरदृष्टी असलेला प्रशासक म्हणून सिद्ध करण्याचा प्रयत्न केला आहे. एका बाजूला देवेंद्र फडणवीस 'देवाभाऊ' अभियानाद्वारे आपली लोकाभिमुख प्रतिमा निर्माण करत असताना, शिंदे यांनी थेट लंडनच्या संसदेतून जागतिक मान्यता मिळवत मुख्यमंत्री पदाच्या शर्यतीतील आपले स्थान अधिक बळकट करण्याचे संकेत दिले आहेत. राज्यातील लोकप्रिय योजनांना आंतरराष्ट्रीय व्यासपीठावर नेऊन त्यांनी प्रशासकीय कौशल्याचे अप्रत्यक्ष आव्हानच राजकीय विरोधक आणि मित्रांसमोर उभे केले आहे.

हे ही वाचा : 'पिंडे पिंडे मतिर्भिन्नः' विद्यानंद बापटांची चावडीवर चौफेर फटकेबाजी

बहुजन मतदारांशी नातं

पुरस्कार सोहळ्यांसोबतच शिंदे यांनी या दौऱ्यात लंडनमधील डॉ. बाबासाहेब आंबेडकर यांच्या ऐतिहासिक निवासाला भेट देऊन आदरांजली वाहण्याचे नियोजन केले आहे. या कृतीतून महाराष्ट्रातील दलित आणि बहुजन मतदारांशी थेट नातं जोडण्याचा स्पष्ट राजकीय प्रयत्न दिसतो. त्याचप्रमाणे, लंडनस्थित उच्चशिक्षित मराठी लोकांशी साधलेला संवाद हा शहरी, मध्यमवर्गीय आणि शिक्षित मतदारांमध्ये आपली एक 'ग्लोबल लीडर' म्हणून नवी ओळख निर्माण करण्याचा चाणाक्ष प्रयत्न मानला जात आहे.

हे ही वाचा : Election Survey: महाराष्ट्राच्या अगदी शेजारच्या राज्यात काँग्रेस देणार जबरदस्त टक्कर, BJP चा मार्ग कठीण; पण...

महाराष्ट्राचे राजकारण तापणार?

थोडक्यात सांगायचे तर, शिंदे यांनी लोककल्याणकारी योजनांचे जागतिक ब्रँडिंग करत एकाच वेळी अनेक राजकीय उद्दिष्टे साध्य केली आहेत. प्रशासकीय क्षमता सिद्ध करणे, बहुजन समाजाला साद घालणे आणि शिक्षित वर्गात स्वतःची प्रतिमा उंचावणे, या सर्व आघाड्यांवर त्यांनी या लंडन दौऱ्याच्या माध्यमातून राजकीय फिल्डिंग लावली आहे. आता लंडनच्या थंड हवेत शिंदे यांना मिळालेले हे पुरस्कार महाराष्ट्राचे राजकारण किती तापवतात, हे पाहणे महत्त्वाचे ठरणार आहे.