शिवसेनेविरोधात जिंकलेल्या गोकुळ गीतेंची श्रीकांत शिंदेंच्या शेजारी बसूनच मोठी घोषणा, शिंदेंच्या खेळीने कोण चेकमेट?
नाशिक विधान परिषद निवडणूक निकालानंतर एकनाथ शिंदेंनी एक मास्टरस्ट्रोक खेळी केली आहे. ज्या उमेदवाराने शिवसेनेच्या उमेदवाराचा पराभव केला त्याच गोकुळ गीतेंना शिवसेनेचे सहयोगी सदस्य म्हणून शिंदेंनी आपल्याकडे वळवून घेतलं.
ADVERTISEMENT
नाशिक: नाशिक विधान परिषद निवडणुकीत शिवसेनेच्या अधिकृत उमेदवार नरेंद्र दराडे यांचा पराभव करून विजयी झालेल्या अपक्ष उमेदवार गोकुळ गीते यांनी अवघ्या काही तासांत राजकीय समीकरणांनाच कलाटणी दिली आहे. निकाल जाहीर झाल्यानंतर तातडीने मुंबईत दाखल झालेल्या गोकुळ गीते यांनी उपमुख्यमंत्री Eknath Shinde यांची भेट घेतली. त्यानंतर खासदार Shrikant Shinde यांच्या उपस्थितीत झालेल्या पत्रकार परिषदेत त्यांनी विधान परिषदेत शिवसेनेचे सहयोगी सदस्य म्हणून काम करण्याची घोषणा केली.
या निर्णयामुळे नाशिकच्या राजकारणात नव्या चर्चांना उधाण आले असून, निवडणुकीत शिवसेनेच्या उमेदवाराचा पराभव करणारे गोकुळ गीते आता प्रत्यक्षात शिंदे यांच्या नेतृत्वाखाली काम करणार असल्याचे स्पष्ट झाले आहे.
मी स्वतः श्रीकांत शिंदेंशी संपर्क साधला - गोकुळ गीते
पत्रकार परिषदेत बोलताना गोकुळ गीते यांनी सांगितले की, निवडून आल्यानंतर त्यांनी स्वतः पुढाकार घेत शिवसेना नेतृत्वाशी संपर्क साधला.
"आज सकाळीच मी श्रीकांत शिंदे साहेब आणि उदय सामंत साहेबांशी संपर्क साधला. त्यावेळी मी त्यांच्याकडे इच्छा व्यक्त केली की, विधान परिषदेत मी शिवसेनेचा सहयोगी सदस्य म्हणून काम करण्यास तयार आहे. त्यानंतर मला नंदनवन बंगल्यावर भेटण्यासाठी बोलावण्यात आले. तिथे शिंदे साहेबांशी सविस्तर चर्चा झाली," असे गीते म्हणाले.
