ऐन निवडणुकीच्या तोंडावर मनसेच्या मोठ्याने नेत्याने राज ठाकरेंची सोडली साथ, 'या' पक्षात करणार एंट्री?

काही दिवसांपूर्वी भाजप प्रदेशाध्यक्ष रविंद्र चव्हाण यांच्या उपस्थितीत झालेल्या कार्यक्रमात प्रकाश भोईर सहभागी झाले होते. त्यानंतरच भोईर यांच्या भाजप प्रवेशाची चर्चा राजकीय वर्तुळात जोर धरू लागली होती. अखेर आज दिलेला त्यांचा राजीनामा ही त्या चर्चेला आणखी बळ देणारी घडामोड मानली जात आहे. मनसेतील महत्त्वाची जबाबदारी सांभाळणारे भोईर यांच्या अचानक घेतलेल्या निर्णयामुळे कल्याण–डोंबिवलीतील मनसे संघटनात्मकदृष्ट्या अडचणीत येण्याची शक्यता व्यक्त केली जात आहे. आगामी काळात प्रकाश भोईर भाजपमध्ये अधिकृत प्रवेश करतात का याकडे सर्वांचे लक्ष लागले आहे.

कल्याण लोकसभा निवडणुकीच्यावेळी शिवसेना शिंदे गट आणि मनसेची छुपी घट्ट युती झाली होती. या युतीच्या माध्यमातून मनसेचे कल्याण ग्रामीणमध्ये महायुतीचे उमेदवार खासदार डाॅ. श्रीकांत शिंदे यांना विजयासाठी मदत करायची. आणि त्यानंतरच्या विधानसभा निवडणुकीत शिवसेना शिंदे गटाचे खासदार श्रीकांत शिंदे यांच्यासह शिवसेनेने राजू पाटील यांच्या विजयासाठी जोर लावायचा हे सूत्र होते. तसेच मनसेचे कल्याण ग्रामीण मधील काही विकास कामे मार्गी लावण्याचे आश्वासन खासदारांनी राजू पाटील यांना दिले होते.

विधानसभा निवडणुकीच्यावेळी शिवसेना शिंदे गटाने राजू पाटील यांना लोकसभा निवडणुकीतील परतफेड म्हणून मदत करण्याऐवजी शिंदे समर्थक राजेश मोरे यांना उमेदवारी देऊन राजू पाटील यांच्या समोर कडवे आव्हान उभे केले. आणि राजेश मोरे यांना राजू पाटील यांच्या विरोधात निवडून आणण्यासाठी जीवाचे रान खासदारांनी केले. या दगाबाजीमुळे मनसेचे राजू पाटील अस्वस्थ झाले. गद्दारांकडून काय अपेक्षा करणार असा सूर नंतर राजू पाटील यांनी जाहीर सभांमधून लावला होता.