T-20 World Cup : पहिल्या पेपरात टीम इंडिया पास, सराव सामन्यात इंग्लंडवर ७ विकेटने मात

सराव सामन्यासाठी भारतीय संघाचा कर्णधार विराट कोहलीने टॉस जिंकत पहिल्यांदा बॉलिंगचा निर्णय घेतला. रोहित शर्माला विश्रांती देत भारताने या सामन्यात लोकेश राहुल आणि इशान किशनला सलामीला पाठवण्याचा निर्णय घेतला. दुसरीकडे इंग्लंडने आपल्या डावाची सावध सुरुवात केली. सलामीवीर जेसन रॉय आणि जोस बटलर यांनी काही सुरेख फटके खेळले. मोहम्मद शमीने बटलरला क्लिन बोल्ड करत इंग्लंडला पहिला धक्का दिला. यानंतर ठराविक अंतराने जेसन रॉयही शमीच्या जाळ्यात अडकला.

मलान आणि बेअरस्टो यांनी संघाचा डाव सावरण्याचा प्रयत्न केला. धोकादायक ठरु पाहणाऱ्या मलानला राहुल चहरने आऊट केलं. यानंतर लिव्हींगस्टोन आणि बेअरस्टो यांनी पुन्हा एकदा निर्णयाक भागीदारी करत इंग्लंडसाठी भराभर धावा जमवल्या. या जोडीच्या फटकेबाजीमुळे इंग्लंडने महत्वाचा शतकी धावसंख्येचा टप्पा ओलांडला. ५२ धावांची भागीदारी झाल्यानंतर पुन्हा एकदा शमीनेच लिव्हींगस्टोनचा अडसर दूर केला.

दुसरीकडे बेअरस्टो एक बाजू लावून फटकेबाजी करत होता. परंतू त्यांचं अर्धशतक केवळ एका धावेने हुकलं. बुमराहने त्याला माघारी धाडलं. अखेरच्या फळीत मोईन अलीने आपली उपयुक्तता सिद्ध करत २० बॉलमध्ये ४ फोर आणि २ सिक्स लगावत ४३ धावांची खेळी करत संघाला १८८ धावांचा टप्पा गाठून दिला. भारताकडून मोहम्मद शमीने ३ तर बुमराह-चहरने प्रत्येकी १-१ विकेट घेतली.