Personal Finance: चांदी तब्बल 15,000 रुपयांनी घसरली... सोनंही गडगडलं! पण असं घडतंय तरी का?

सायंकाळी 7 वाजता, MCX वर सोन्याचा भाव 3,000 रुपयांपेक्षा जास्त घसरून 1.40 लाख रुपये प्रति 10 ग्रॅम झाला. बुधवारच्या बंद भावाच्या तुलनेत सोन्याच्या दरात 2% पेक्षा जास्त घसरण झाली. दरम्यान, मे महिन्याच्या वायद्यांमधील चांदीचे भाव जवळपास 15,000 रुपयांनी घसरून 2.20 लाख रुपये प्रति किलोच्या खाली आले. बुधवारच्या तुलनेत चांदीच्या भावात 6 टक्क्यांपर्यंत घसरण झाली.

सोन्या-चांदीच्या दरात इतकी मोठी घसरण का झाली?

अमेरिका आणि इराण यांच्यातील परिस्थिती अस्पष्ट आहे. अमेरिकेने इराणसोबतचे युद्ध संपवण्यासाठी 15 अटी ठेवल्या, ज्या इराणने फेटाळल्या. ट्रम्प यांनी इशारा दिला आहे की, हा प्रस्ताव स्वीकारण्यास विलंब केल्यास त्याचे गंभीर परिणाम होतील. या वक्तव्यामुळे भू-राजकीय धोका वाढला आहे.

दुसरीकडे, इराणने म्हटले आहे की, लष्करी कारवाई केल्यास किंवा दबाव आणल्यास, ते होर्मुझच्या सामुद्रधुनीसोबतच बाब अल-मंडाबचा चोकपॉईंटही बंद करू शकते, ज्यामुळे जागतिक पुरवठ्यात आणखी व्यत्यय येईल. या घटकांमुळे कच्च्या तेलाच्या किंमतीत मोठी वाढ झाली आहे.

कच्च्या तेलाच्या वाढत्या किंमती

डब्ल्यूटीआय (WTI) कच्च्या तेलाच्या किंमती 2.93 टक्क्यांनी वाढून 92.99 डॉलर प्रति बॅरल झाल्या आहेत. ब्रेंट कच्च्या तेलाच्या किमती 4 टक्क्यांहून अधिक वाढून 101 डॉलर प्रति बॅरलच्या वर पोहोचल्या आहेत. तेलाच्या किंमती वाढल्यामुळे डॉलरही मजबूत झाला आहे, ज्यामुळे सोने आणि चांदीच्या किंमतीत मोठी घसरण झाली आहे.

सोने आणि चांदी त्यांच्या विक्रमी दरावरून किती घसरले आहेत?

जानेवारीमध्ये सोन्याने प्रति 10 ग्रॅम ₹1.93 लाखांचा विक्रमी उच्चांक गाठला होता, पण आता त्याचे दर ₹1.40 लाख रुपये एवढा झाला आहे. परिणामी, सोने त्याच्या विक्रमी उच्चांकावरून ₹53,000 ने घसरले आहे. चांदी, जी जानेवारीमध्ये प्रति किलो ₹4.20 लाखांवर पोहोचली होती, ती आता ₹2.20 लाखांवर घसरली आहे. याचा अर्थ ती तिच्या विक्रमी उच्चांकावरून ₹2 लाखांनी घसरली आहे.

(टीप: सोने किंवा चांदीमध्ये गुंतवणूक करण्यापूर्वी, कृपया एका पात्र सल्लागाराचा सल्ला घ्या. mumbaitak.in कोणत्याही प्रकारचा गुंतवणुकीचा सल्ला देत नाही.)