बाबा सिद्दीकींच्या हत्याप्रकरणात 'बिल्डर लॉबी'चा संबंध नाही, मुंबई पोलिसांनी उच्च न्यायालयात सादर केलं प्रतिज्ञापत्र

वांद्रे येथे 12 ऑक्टोबर 2024 रोजी झालेल्या या हत्येचा मुख्य उद्देश अनमोल बिश्नोई टोळीने स्वतःचे वर्चस्व प्रस्थापित करणे आणि खंडणी वसुलीसाठी दहशत निर्माण करणे हाच होता, असे पोलीस तपासात समोर आले आहे. सिद्दीकी यांच्या पत्नी शहझीन सिद्दीकी यांनी दाखल केलेल्या याचिकेला उत्तर देताना पोलिसांनी ही माहिती दिली. शहझीन यांनी आपल्या याचिकेत पोलिसांचा तपास 'अपूर्ण आणि दिशाभूल करणारा' असल्याचा दावा करत, काही बड्या बिल्डरांच्या चौकशीची मागणी केली होती.

हेही वाचा : रंग खेळून नदीवर गेला अन् परतलाच नाही, वैनगंगेत बुडून इंजिनिअरचा मृत्यू; अंत्यसंस्कारासाठी लाकडंच मिळेनात

शहझीन सिद्दीकी यांनी पोलीस यंत्रणेवर केलेले सर्व आरोप तथ्यहीन असून, केवळ तपास अधिकाऱ्यांवर दबाव निर्माण करण्यासाठी हे दावे केले जात असल्याचे पोलिसांनी न्यायालयात सांगितले. वांद्रे ते अंधेरी दरम्यानच्या झोपडपट्टी पुनर्विकास प्रकल्पांमधील वजनदार बिल्डरांची चौकशी जाणीवपूर्वक टाळण्यात आल्याचा आरोपही पोलिसांनी फेटाळून लावला आहे. तपासादरम्यान कोणत्याही बिल्डरचा या हत्येशी थेट संबंध असल्याचे ठोस पुरावे आढळले नसल्याचे प्रतिज्ञापत्रात स्पष्ट करण्यात आले आहे.

सहायक पोलीस आयुक्त किशोरकुमार शिंदे यांनी सादर केलेल्या माहितीनुसार, साक्षीदारांचे जबाब, तांत्रिक पुरावे आणि उपलब्ध दस्तऐवजांच्या आधारेच कायद्याने निर्धारित प्रक्रियेनुसार आरोपपत्र दाखल करण्यात आले आहे. मुख्य आरोपी अनमोल बिश्नोई याच्या प्रत्यार्पणासाठी सुरू असलेली कायदेशीर कार्यवाही ही तपास यंत्रणेच्या सातत्यपूर्ण प्रयत्नांचा भाग आहे. संपूर्ण तपास प्रक्रिया पारदर्शक असून त्यात कोणत्याही त्रुटी नसल्याचे पोलिसांनी न्यायालयासमोर स्पष्ट केले आहे.

इतर महत्त्वाच्या बातम्या 

रंग खेळून नदीवर गेला अन् परतलाच नाही, वैनगंगेत बुडून इंजिनिअरचा मृत्यू; अंत्यसंस्कारासाठी लाकडंच मिळेनात