मुंबई : बाळ चोरणारा समजून बुरखा घातलेल्या माणसाला मारहाण, पण प्रकरण वेगळंच निघालं

अधिकची माहिती अशी की, बुधवारी सकाळी सुमारे 11.30 वाजण्याच्या सुमारास पार्कसाइट परिसरात एक व्यक्ती बुरखा घालून संशयास्पदरीत्या फिरत असल्याचे काही नागरिकांच्या निदर्शनास आले. याच दरम्यान परिसरात बाळ चोरीच्या अफवा आधीच पसरलेल्या असल्याने नागरिकांचा संशय अधिक बळावला. काही वेळातच ‘बाळ चोर आला आहे’ अशी ओरड सुरू झाली आणि क्षणातच मोठा जमाव जमा झाला. कोणतीही खात्री न करता जमावाने त्या व्यक्तीला पकडून मारहाण सुरू केली.

परिस्थिती चिघळत असल्याचे लक्षात येताच स्थानिकांनी पार्कसाइट पोलिसांना घटनेची माहिती दिली. पोलिसांनी तत्काळ घटनास्थळी धाव घेत त्या व्यक्तीला जमावाच्या तावडीतून सोडवले आणि ताब्यात घेतले. त्यानंतर त्याची चौकशी सुरू करण्यात आली.

पोलिस तपासात संबंधित व्यक्तीची ओळख तौसीफ मोहम्मद शेख (वय 33) अशी पटली. तो व्यवसायाने रिक्षाचालक असून पार्कसाइटमधीलच चंद्रभागा सोसायटीत राहणारा आहे. चौकशीत तौसीफने दिलेल्या माहितीनुसार, दोन दिवसांपूर्वी त्याने काही प्रवाशांना आनंदगड नाका येथे सोडले होते. मात्र भाड्याच्या पैशांवरून त्याचा त्या प्रवाशांशी वाद झाला आणि त्यांनी पैसे न देता पळ काढला. त्या व्यक्तींना ओळखता यावे आणि ते सापडावेत, यासाठी आपली ओळख लपवण्याच्या उद्देशाने त्याने बुरखा परिधान केल्याचे तौसीफने सांगितले.

पोलिसांनी स्पष्ट केले की तौसीफचा बाळचोरीशी किंवा कोणत्याही गुन्हेगारी कृत्याशी दूरान्वयानेही संबंध नाही. सोशल मीडियावर त्याला ‘बाळ चोर’ ठरवून फिरवले जाणारे संदेश व व्हिडीओ पूर्णपणे खोटे आणि दिशाभूल करणारे असल्याचे पोलिसांनी नमूद केले आहे. दरम्यान, अफवांमुळे कायदा हातात घेणाऱ्या जमावप्रवृत्तीबाबत पोलिसांनी तीव्र नाराजी व्यक्त केली आहे. कोणतीही शंका असल्यास थेट पोलिसांशी संपर्क साधावा, अफवांवर विश्वास ठेवू नये आणि कुणावरही स्वतःहून कारवाई करू नये, असे आवाहन पार्कसाइट पोलिसांनी नागरिकांना केले आहे. या प्रकरणी पुढील तपास सुरू असून, कायद्याप्रमाणे आवश्यक ती कारवाई करण्यात येणार असल्याचे पोलिसांनी सांगितले आहे.

इतर महत्त्वाच्या बातम्या 

1 महिनाभर तरुणीला ठेवलं हॉटेलमध्ये, मित्रांना तिथे बोलायवायचा अन्... तरुणीची झाली भयंकर अवस्था