मुंबई: मॅट्रिमोनियल साइटवर पाठवली रिक्वेस्ट; IPS अधिकाऱ्याचा मुलगा असल्याचा दावा अन्... घटस्फोटित महिलेसोबत केलं नको ते

मॅट्रिमोनियल वेबसाइटवर पाठवली रिक्वेस्ट... 

आरोपी विराजवर मुलुंडमधील रहिवासी असलेल्या एका महिलेकडून 17.70 लाख रुपये लुबडल्याचा आरोप आहे. पोलिसांनी त्याची मर्सिडीज कार जप्त केल्याची माहिती आहे. पोलिसांच्या चौकशीदरम्यान आरोपीने सांगितलं की, त्याचं मुंबईत कायमचं घर नसून तो त्याच्या कारमध्येच राहतो. पोलिसांच्या माहितीनुसार, तक्रारदार 42 वर्षीय ग्राफिक डिझायनर असून ती मुलुंडमध्ये राहते. तिचा दहा वर्षांपूर्वी घटस्फोट झाला होता आणि त्यानंतर, सुमारे चार वर्षांपूर्वी तिने एका मॅट्रिमोनियल वेबसाइटवर स्वत:ची प्रोफाइल तयार केली होती. गेल्या वर्षी सप्टेंबर महिन्यात तिला लग्नासाठी प्रपोजल रिक्वेस्ट आली होती, मात्र तिने त्याकडे दुर्लक्ष केलं. नंतर, त्याच पुरुषाने ऑक्टोबर महिन्यात तिला आणखी एक रिक्वेस्ट पाठवली आणि त्या महिलेने ती रिक्वेस्ट अॅक्सेप्ट केली. 

आरोपीचा खोटा दावा 

आरोपीने दुसऱ्या दिवशी तिच्याशी संपर्क साधला आणि पुण्यातील रहिवासी असलेला विराज भोसले अशी स्वतःची ओळख करून दिली. त्याचे वडील आयपीएस अधिकारी आहेत आणि आई फिजिओथेरपिस्ट असून त्याची बहीण यूकेमध्ये राहत असल्याचा त्याने दावा केला. त्याने त्या महिलेला पुढे सांगितलं की तो स्त्री सूत्रम फाउंडेशन या स्वयंसेवी संस्थेचा अध्यक्ष आहे आणि त्याचे महाराष्ट्रातील राजकारणी तसेच इतर मोठ्या पदांवरील लोकांशी जवळचे संबंध आहेत. 

पीडितेच्या म्हणण्यानुसार, आरोपी भोसले याने सीएसआर निधी, निर्भया निधी आणि अनेक सरकारी योजना मॅनेज करत असल्याचा केला. या योजनांद्वारे त्याने घटस्फोटित आणि विधवा महिला तसेच सिंगल मदर्स म्हणजेच एकट्या मातांना आर्थिक मदत केल्याचं त्याने पीडितेला सांगितलं. या योजनांद्वारे महिलेला मुंबईत परवडणारं घर मिळवून देण्यास मदत करण्याचं त्याने आश्वासन देत त्याने तिच्याकडून सुरुवातीला 7 लाख रुपयांची मागणी केली. 

हे ही वाचा: केरळची सर्वात लहान organ donor; 10 महिन्यांची चिमुकली 5 जणांचा जीव वाचवणार!

आरोपी तरुणाला अटक 

महिलेने त्याच्यावर विश्वास ठेवून तिच्या बचत खात्यातून त्याला पैसे ट्रान्सफर केले. त्यानंतर आरोपीने वेगवेगळ्या योजनांबद्दल सांगून आणखी पैशांची मागणी केली. पीडितेने पर्सनल लोन काढलं आणि शेवटी गुगल पे द्वारे एकूण 17.70 लाख आरोपीच्या खात्यात ट्रान्सफर केले. काही दिवसांनंतर, आरोपीने तिच्या व्हॉट्सअॅप मेसेज आणि कॉलला उत्तर देणं बंद केलं आणि त्यानंतर तक्रारदार महिलेला आपली फसवणूक झाल्याचं लक्षात आलं. अखेर, तिने नवघर पोलिस ठाण्यात जाऊन 3 फेब्रुवारी रोजी भारतीय दंड संहिता (IPC) च्या कलम 318(4), 352 आणि 351(2) अंतर्गत आरोपीविरुद्ध गुन्हा दाखल केला.

आरोपीच्या मोबाईल फोन लोकेशनच्या आधारे, पोलिसांनी त्याला वर्सोवा येथे ट्रेस केलं आणि त्याला अटक करून न्यायालयात हजर करण्यात आलं. आता आरोपीला 15 फेब्रुवारीपर्यंत पोलिस कोठडी सुनावण्यात आली. तपासादरम्यान, पोलिसांना आढळून आलं की भोसलेने लग्नाचं खोटं आश्वासन देऊन तसेच सरकारी कल्याणकारी योजनांच्या बहाण्याने अनेक महिलांना फसवलं. पोलिस अधिकाऱ्यांच्या म्हणण्यानुसार, संबंधित आरोपीविरुद्ध ठाणे, मुंबई पोलिस स्टेशन आणि आर्थिक गुन्हे शाखेत (EOW) अनेक गुन्हे दाखल आहेत.