कोट्यावधींचा हुंडा, तरीही चौधरी कुटुंबाची भूक भागेना, वंशाला दिवा हवा म्हणून गर्भपात; सरपंचाच्या सुनेची आत्महत्या

सासरच्या चार जणांना अटक 

या प्रकरणी पोलिसांनी पतीसह सासरच्या चार जणांना अटक केली आहे. अटक करण्यात आलेल्या आरोपींमध्ये रोहन कारभारी चौधरी (पती), सुनिता कारभारी चौधरी (सासू – सरपंच, सोरतापवाडी), कारभारी चौधरी (सासरे) आणि रोहित कारभारी चौधरी (दीर) यांचा समावेश आहे. सर्व आरोपी हे सोरतापवाडी, ता. हवेली, जि. पुणे येथील रहिवासी आहेत. मृत दीप्ती मगर हिची आई सौ. हेमलता बाळासाहेब मगर (रा. मगरपट्टा सिटी, हडपसर) यांनी या प्रकरणी उरुळी कांचन पोलीस ठाण्यात फिर्याद दाखल केली आहे.

'तू माझ्या रूपाला साजेशी नाहीस, तुला घरकाम येत नाही'

पोलिसांनी दिलेल्या माहितीनुसार, 23 नोव्हेंबर 2019 रोजी दीप्ती मगर हिचा विवाह रोहन चौधरी याच्याशी रीतिरिवाजाप्रमाणे पार पडला. दोन्ही कुटुंबे आर्थिकदृष्ट्या सक्षम असतानाही लग्नाच्या काही महिन्यांतच पती रोहन याने दीप्तीच्या चारित्र्यावर संशय घेण्यास सुरुवात केली. “तू माझ्या रूपाला साजेशी नाहीस, तुला घरकाम येत नाही,” अशा अपमानास्पद शब्दांत तो दीप्तीचा सातत्याने मानसिक छळ करत होता.

हेही वाचा : बार्शीत दोन्ही शिवसेना एकत्र आल्यानंतर उद्धव ठाकरे काय म्हणाले? सुषमा अंधारेंनी सगळं सांगितलं VIDEO

लग्नाच्या पाच वर्षांनंतर दीप्तीला मुलगी झाली. मात्र मुलगी झाल्याने सासरच्या मंडळींनी नाराजी व्यक्त केली. डिलिव्हरीनंतर दीप्ती सासरी नांदायला गेल्यावर व्यवसाय अडचणीत असल्याचे कारण देत माहेरून पैशांची मागणी करण्यात आली. त्यानुसार दीप्तीच्या पालकांनी 10 लाख रुपये दिले. त्यानंतर “लग्नात गाडी दिली नाही” या कारणावरून पुन्हा 25 लाख रुपयांची मागणी करण्यात आली. ही रक्कमही रोख स्वरूपात दिल्याचे फिर्यादीत नमूद आहे.

दीप्तीला लग्नात मिळालेले 25 तोळे सोन्याचे दागिने सुरक्षिततेच्या कारणास्तव सासू-सासऱ्यांनी स्वतःकडे ठेवले होते. मात्र पुढे एका कार्यक्रमासाठी दागिने मागितले असता, ते नवीन व्यवसायासाठी गहाण ठेवल्याचे सांगण्यात आले.

ऑक्टोबर 2025 मध्ये सासू सुनिता चौधरी सरपंच झाल्यानंतर पुन्हा पैशांची मागणी करण्यात आली. यावेळी दीप्तीने नकार दिल्याने तिच्या माहेरच्यांबाबत अपमानास्पद वक्तव्य करण्यात आल्याचा आरोप आहे. तसेच दीप्ती गर्भवती असताना गर्भलिंग तपासणीसाठी दबाव टाकण्यात आला. पाच महिन्यांचा गर्भ मुलगी असल्याचे समजताच जबरदस्ती सिझेरियनद्वारे गर्भपात करवून घेतल्याचा गंभीर आरोप फिर्यादीत करण्यात आला आहे.

याशिवाय दीप्तीच्या नावावर असलेली जमीन आणि फार्महाऊस विकण्यासाठीही तिच्यावर दबाव टाकण्यात येत होता. सततच्या मानसिक, आर्थिक आणि शारीरिक छळामुळे नैराश्यात गेलेल्या दीप्तीने 24 तारखेला आपल्या राहत्या घरी गळफास घेऊन आत्महत्या केली.

या प्रकरणी उरुळी कांचन पोलिसांनी आत्महत्येस प्रवृत्त करणे, हुंडाबळी तसेच गर्भलिंग तपासणी व गर्भपात प्रतिबंधक कायद्यानुसार गुन्हे दाखल केले असून सर्व आरोपींना अटक करण्यात आली आहे. पुढील तपास सुरू असल्याची माहिती पोलिसांनी दिली आहे.

इतर महत्त्वाच्या बातम्या 

नालासोपाऱ्यात आईने 15 वर्षाच्या मुलीची दगडी जात्याने डोकं ठेचून केली हत्या, खूनाचं कारण आलं समोर