माजी नगरसेवकाच्या हत्येचा बदला, आरोपीच्या भावाला गोळ्या घालून संपवलं, आंदेकर-कोमकर गँगवॉर; काय काय घडलं?

पोलिसांच्या माहितीनुसार, गणेश दुपारी रिक्षा चालवत येवलेवाडीहून खडीमशीन चौकाच्या दिशेने येत होता. त्याच्यापाठी दोन दुचाकींवरून चार जण आले होते. पेट्रोलपंपाजवळ त्यांनी त्याची रिक्षा अडवून गोळीबार केला. मानेत, छातीत आणि पोटात गोळ्या लागल्याने गणेश घटनास्थळीच मरण पावला. दोन हल्लेखोरांनी कोयत्यानेही डोक्यावर वार केले. पोलिसांना घटनास्थळी एक दुचाकी सोडलेली आढळली. आरोपी चारही जण एका दुचाकीवरून फरार झाले होते. मात्र, रात्री साडेनऊच्या सुमारास त्यांना शस्त्रांसह अटक करण्यात आल्याचे पोलिस उपायुक्त शिंदे यांनी सांगितले. प्राथमिक तपासात चार ते पाच राऊंड फायर झाल्याचा अंदाज वर्तवण्यात आला आहे. या हत्येमागील कारण अद्याप स्पष्ट नसले तरी पोलिसांच्या मते गँगवॉरमधून ही घटना घडली असावी.

हेही वाचा : CCTV: निखील कांबळे मागून आला आणि सिद्धारामचा घेतला जीव, कुऱ्हाडीचे वार घालतच बसला.. नेमकं असं घडलं तरी काय?

पुण्यात गँगवॉर सुरुच

5 सप्टेंबर रोजी झालेल्या आयुष कोमकर हत्येनंतर आंदेकर आणि कोमकर टोळ्यांमधील संघर्ष पुन्हा उफाळला होता. त्या घटनेत आंदेकर गटाने वर्चस्वासाठी हल्ला केला होता. आता गणेश काळेच्या हत्येमुळे दोन्ही टोळ्यांतील वैर पुन्हा भडकले आहे. सध्या आंदेकर, कोमकर आणि सोम्या गायकवाड टोळीचे सदस्य तुरुंगात आहेत. दोन्ही गटांवर मकोका कारवाई करण्यात आली असून, आंदेकर टोळीप्रमुख बंडू उर्फ सूर्यकांत आंदेकर याचे आर्थिक साम्राज्य पोलिसांनी उद्ध्वस्त केले आहे. तरीही ही नवीन हत्या पोलिसांच्या दक्षतेवर प्रश्नचिन्ह उपस्थित करते.

माजी नगरसेवक वनराज आंदेकर यांची हत्या कधी झाली?

1 सप्टेंबर 2024 रोजी नाना पेठेत माजी नगरसेवक वनराज आंदेकर यांची गोळ्या झाडून व कोयत्याने वार करून हत्या झाली होती. या प्रकरणात समीर काळे आरोपी आहे. त्यानंतर बदला म्हणून 5 सप्टेंबरला आयुष कोमकर याची गोळ्या झाडून हत्या करण्यात आली. त्या प्रकरणात बंडू आंदेकर आणि त्याच्या साथीदारांना अटक झाली होती. आता समीर काळेचा भाऊ गणेश याचाही अशाच प्रकारे खून झाल्याने पोलिस तपास आंदेकर टोळीकडे वळला आहे.

मालमत्तेवरील वाद आणि आंदेकर आणि कोमकर टोळीत गँगवॉर

आंदेकर आणि कोमकर कुटुंबीयांमधील मालमत्तेच्या वादातून आणि टोळीतील सत्तासंघर्षातून हे हत्याकांड सुरू झाल्याचे तपासात समोर आले आहे. या प्रकरणात संजीवनी कोमकर, जयंत कोमकर, गणेश कोमकर, सोमनाथ गायकवाड, अनिकेत दूधभाते यांसह 16 जणांना पोलिसांनी अटक केली होती. वनराज आंदेकर यांच्या हत्येसाठी लागलेली पिस्तुले समीर काळे आणि त्याच्या साथीदारांनी मध्यप्रदेशातून आणल्याचे पोलिसांनी स्पष्ट केले आहे.

इतर महत्त्वाच्या बातम्या 

'...तर मराठी पैलवानावर अन्याय होईल', सिकंदर शेखसाठी खासदार सुप्रिया सुळेंकडून पंजाब सरकारशी बोलणी सुरु