महालक्ष्मी अन् तुळजाभवानीचं दर्शन घेऊन विठुरायाच्या दर्शनाला निघाले, पण वाटेत काळाचा घाला; चौघांचा मृत्यू

डोंबिवलीच्या चार भाविकांचा मृत्यू   

पंढरपूर-मंगळवेढा रस्त्यावर शरद नगर येथे सोमवारी संध्याकाळच्या सुमारास भीषण अपघात झाला असून या अपघातात देवदर्शनासाठी गेलेल्या भाविकांना आपला जीव गमवावा लागल्याचं वृत्त आहे. मिळालेल्या माहितीनुसार, डोंबिवलीतील 12 भाविक दोन दिवसांपूर्वी सोलापूर, कोल्हापूर, पंढरपूर यात्रेसाठी गेले होते. महालक्ष्मी देवी आणि तुळजा भवानी देवीचे दर्शन घेतल्यानंतर ते विठ्ठल-रुक्मिणीच्या दर्शनासाठी पंढरपूरकडे निघाले होते. दरम्यान, एका भरधाव वेगाने येणाऱ्या ट्रकने गाडीला धडक दिली. धडक इतकी जोरदार होती की गाडी ट्रकसह सुमारे 30 फूट फरफटत गेली आणि पूर्णपणे चिरडली गेली. काही प्रवासी रस्त्यावर पडले, तर काही जण गाडीत अडकले. या दुर्दैवी घटनेत डोंबिवलीच्या चार भाविकांचा मृत्यू झाला असून त्यामध्ये एक 14 वर्षीय मुलगा आणि तीन महिलांचा समावेश असल्याचं सांगितलं जात आहे. 

अपघातातील मृत व्यक्तींची नावे 

1. योगिनी केकाणे (डोंबिवली)  
2. सविता गुप्ता (डोंबिवली) 
3. सोनम अहिरे (कल्याण) 
4. आदित्य गुप्ता (परळ) 

हे ही वाचा: ट्रेन उशीरा आल्याने पेपर चुकला, आता विद्यार्थीनीला भरपाई म्हणून 9 लाख रुपये मिळणार!

ओव्हरटेक करताना झाला अपघात 

जखमींमध्ये कविता तुडास्कर, सोनम गुप्ता, राजश्री कदम-सोनवणे, आरती गुप्ता, वेद गुप्ता, गणेश गुप्ता, रोहन केकाणे, अंजनी यादव आणि चालक नवनाथ हिडकिट्टी यांचा समावेश आहे. त्यापैकी काहींना किरकोळ दुखापत झाली असून त्यांच्यावर जिल्हा रुग्णालयात उपचार सुरू आहेत. या दुर्दैवी अपघाताची बातमी पसरताच डोंबिवलीत शोककळा पसरली. आमदार राजेश मोर यांनी पीडित कुटुंबाची भेट घेण्यासाठी त्यांच्या घरी पोहोचले. दरम्यान, ओव्हरटेक करताना हा भीषण अपघात झाल्याची प्राथमिक माहिती आमदारांनी दिली आहे.