जामखेड : नृत्यांगणा दिपाली पाटीलची लॉजवर गळफास घेऊन आत्महत्या, भाजप नेता मुख्य आरोपी असल्याने खळबळ

भाजपाचे माजी नगरसेवक संदीप गायकवाड मुख्य आरोपी 

दिपाली बाजारात जात असल्याचे सांगून घरातून निघाली होती. बराच वेळ उलटूनही ती न परतल्याने मैत्रीण शोध घेत लॉजवर पोहोचली. दरवाजा न उघडल्याने वेटरच्या मदतीने खोली उघडण्यात आली असता दिपालीने गळफास घेतल्याचे दिसून आले. मृतदेह शवविच्छेदनासाठी पाठवण्यात आला आहे. या प्रकरणात भाजपाचे माजी नगरसेवक संदीप गायकवाड यांना आरोपी करण्यात आले असून पोलिसांनी तपास सुरू केला आहे. कर्जत जामखेडचे आमदार आमदार रोहित पवार यांनी या घटनेवर गंभीर प्रश्न उपस्थित करत संबंधित लॉजचे सीसीटीव्ही फुटेज जप्त करून सखोल चौकशीची मागणी केली आहे.

हेही वाचा : माजी नेत्याच्या सुनेसोबत धक्कादायक घटना! लग्नानंतर एका महिन्यातच आत्महत्या केल्याचा आरोप... नेमकं प्रकरण काय?

रोहित पवार काय काय म्हणाले? 

रोहित पवार म्हणाले, आत्महत्येस प्रवृत्त केल्याप्रकरणी जामखेड पोलीस ठाण्यात संदीप गायकवाड याच्याविरोधात गुन्हा दाखल करण्यात आला. हा तोच आरोपी आहे ज्याच्या पत्नीला भाजपने नगरसेवक पदाची उमेदवारी दिली आहे. स्वतःचं लग्न झालं असतानाही एका नर्तिकेवर लग्न करण्यासाठी दबाव आणल्यामुळं तिच्यावर आत्महत्या करण्याची वेळ या आरोपीमुळे आली. या घटनेमुळे भाजपचा खरा चेहरा पुढं आला आणि असे अनेक नमुने आहेत ज्यांना भाजपने नगरपरिषद निवडणुकीत उमेदवारी दिली.. हिच आहे #party_with_difference भाजपा. आता कोणत्याही दबावाला बळी न पडता आत्महत्या केलेल्या महिलेला न्याय मिळवून द्यावा. एका महिलेला न्याय मिळावा म्हणून आमचंही या गुन्ह्याच्या तपासाकडे बारकाईने लक्ष राहील.

कर्जत जामखेडचे आमदार रोहित पवार म्हणाले, जामखेडमधील अवैध धंदे आणि गुन्हेगारी याबाबत कायमच आवाज उठवतोय परंतु या धंद्यांना कुणाचा आश्रय मिळतो हे आता लपून राहिलं नाही. अशातच जामखेडमध्ये नृत्यांगना दिपाली पाटील (३५) यांनी एका लॉजमध्ये आत्महत्या केल्याची बातमी आली. आत्महत्या करण्यापूर्वी संबंधित महिलेसोबत कोण होतं? त्याचे काय संबंध आहेत? त्याला कोणत्या उच्चपदस्थांचा वरदहस्त आहे? आणि त्याच्या कुटुंबातील व्यक्तीने कोणत्या पक्षाकडून निवडणूक लढवली? याची सखोल चौकशी करण्यासाठी संबंधित लॉजवरील सीसीटीव्ही फुटेज पोलिसांनी ताब्यात घेऊन या गुन्ह्याची उकल करावी. यातून अनेकांचे काळे चेहरे उघड झाल्याशिवाय राहणार नाहीत. संबंधित महिलेला न्याय मिळवून देण्यासाठी हे प्रकरण दडपण्याचा कुणी प्रयत्न केला तर तो आम्ही यशस्वी होऊ देणार नाही.

इतर महत्त्वाच्या बातम्या 

माजी नेत्याच्या सुनेसोबत धक्कादायक घटना! लग्नानंतर एका महिन्यातच आत्महत्या केल्याचा आरोप... नेमकं प्रकरण काय?