उपचाराच्या बहाण्याने डॉक्टरने स्वत:च्या काका-काकीला भूलीचे हाय डोस देऊन संपवलं, 24 तासात झाला उलगडा

ही घटना भद्रावतीतील भूतानागुडी परिसरातील आहे. येथे राहणारे 75 वर्षीय चंद्रप्पा आणि त्यांची 65 वर्षीय पत्नी जयम्मा हे दाम्पत्य घरात मृतावस्थेत आढळले. चंद्रप्पा हे VISL मधून निवृत्त कर्मचारी होते. दाम्पत्याला तीन मुलगे असून ते वेगवेगळ्या ठिकाणी राहतात. 20 जानेवारी रोजी मृत्यूची माहिती समोर येताच परिसरात खळबळ उडाली. प्रकरणाची नोंद ओल्ड टाउन पोलीस ठाण्यात करण्यात आली.

नातलगच कसा ठरला मारेकरी?

पोलिस तपासात आरोपी कोण दुसरा नसून चंद्रप्पा यांचा भाचा असल्याचं निष्पन्न झालं. आरोपीची ओळख 44 वर्षीय आयुर्वेदिक डॉक्टर जी. पी. मल्लेश अशी आहे. मल्लेशवर मोठ्या प्रमाणात कर्ज होतं. त्याने काकाकडे आर्थिक मदत मागितली होती; मात्र मदत न मिळाल्याने राग आणि लालसा यांची सरमिसळ होऊन तो गुन्ह्याच्या मार्गावर गेला. पोलिसांच्या मते, घरातील मौल्यवान दागिन्यांवर डल्ला मारणं हा त्यामागचा मुख्य हेतू होता.

मृत्यूचं इंजेक्शन कसं देण्यात आलं?

19 जानेवारी दुपारी मल्लेश काका-काकींच्या घरी गेला. तब्येतीची चौकशी करताना त्यांच्या नसांच्या आजारावर व्हॅरिकोज वेन्स उपचाराची ऑफर दिली. विश्वास संपादन करून त्याने जनरल अ‍ॅनेस्थेसिया ‘प्रोपोफोल’चा अतिप्रमाणात डोस दिला. सामान्यतः शस्त्रक्रियेत याची मात्रा 1 ते 2 मिलीग्रॅम असते; मात्र आरोपीने दोघांनाही सुमारे 50 मिलीग्रॅम इंजेक्शन दिलं. या हाय डोसमुळे काही वेळातच दोघांचा मृत्यू झाला.

तपासात समोर आलेले महत्त्वाचे धागे

घरात जबरदस्तीने प्रवेश केल्याचे कोणतेही चिन्ह नव्हते.
कपाट किंवा सामान अस्ताव्यस्त नव्हते.
केवळ दागिने गायब असल्याचं दिसून आलं.
आरोपीचा घरात नियमित ये-जा होती.
आर्थिक अडचणी आणि कर्जाचा दबाव स्पष्ट झाला.

24 तासांत मर्डर मिस्ट्रीचा उलगडा कसा झाला?

शिवमोगाचे एसपी बी. निखिल यांनी सांगितलं की, क्राइम सीनवरूनच मारेकरी घरातील ओळखीचाच असावा, हे स्पष्ट होतं. त्यानुसार नातलगांची चौकशी सुरू करण्यात आली. 20 जानेवारी रोजी आरोपीला ताब्यात घेण्यात आलं. कसून चौकशीत त्याने गुन्ह्याची कबुली दिली. सध्या पोलिस भूलीच्या औषधाचा स्रोत, तसेच चोरी गेलेल्या दागिन्यांच्या रिकव्हरीसाठी तपास करत आहेत.

इतर महत्त्वाच्या बातम्या 

मुंबईचं महापौर पद सर्वसाधारण महिलेसाठी राखीव, भाजपच्या गोटातून 'या' नगरसेविकेचं नाव सर्वात आघाडीवर