Lalbaugcha Raja 2026 First Look: ही पाहा लालबागच्या राजाची पहिली झलक, यंदा नेमकी कोणती थीम?

प्रथम दर्शन सोहळ्यात लालबागच्या राजाचं मनमोहक आणि आकर्षक रूप भाविकांना पाहायला मिळालं. बाप्पाच्या मूर्तीभोवती करण्यात आलेली सजावट, रोषणाई आणि भव्य दरबार यामुळे यंदाच्या गणेशोत्सवाची उत्सुकता आणखी वाढली आहे.

शिव शंकर थीमची भव्य सजावट

यंदाच्या सजावटीमध्ये भगवान शिवशंकराच्या संकल्पनेचा प्रभाव ठळकपणे पाहायला मिळतो. विशेष म्हणजे केवळ बाप्पाच्या दरबारापुरती ही थीम मर्यादित नसून, प्रवेशद्वारापासून ते थेट लालबागच्या राजाच्या दरबारापर्यंत सजावटीत एकच थीम कायम ठेवण्यात आली आहे.

भव्य प्रवेशद्वार, त्यानंतरची सजावट आणि अखेरीस बाप्पाचा दरबार अशा पद्धतीने संपूर्ण परिसराची रचना करण्यात आली आहे. त्यामुळे भाविकांना मंडपात प्रवेश केल्यापासून एका विशिष्ट धार्मिक आणि आध्यात्मिक वातावरणाचा अनुभव घेता येणार आहे.

14 सप्टेंबरपासून गणेशोत्सवाला सुरुवात

यंदाचा लालबागच्या राजाचा गणेशोत्सव 14 सप्टेंबरपासून सुरू होणार आहे. गणेशोत्सवाच्या काळात मुंबईसह देशभरातून मोठ्या संख्येने भाविक लालबागमध्ये दाखल होतात.

14 सप्टेंबर ते 25 सप्टेंबर या कालावधीत भाविकांना लालबागच्या राजाचं दर्शन घेता येणार आहे. त्यामुळे पुढील काही दिवसांत लालबाग परिसरात भक्तांची मोठी गर्दी पाहायला मिळण्याची शक्यता आहे.

पहिल्या झलकने वाढली उत्सुकता

लालबागच्या राजाच्या प्रथम दर्शन सोहळ्यानंतर सोशल मीडियावरही बाप्पाच्या रूपाची आणि मंडपाच्या सजावटीची चर्चा सुरू झाली आहे. दरवर्षीप्रमाणे यंदाही लालबागच्या राजाचं दर्शन घेण्यासाठी मुंबईकरांसह राज्याच्या विविध भागांतून भाविक येणार आहेत.

शिवशंकर थीम, भव्य सजावट आणि आकर्षक बाप्पाचं रूप यामुळे यंदाचा लालबागच्या राजाचा गणेशोत्सव खास ठरण्याची चिन्हं आहेत.