हॉटेल चालवून उदरनिर्वाह

मृत कारभारी आंधळे हे परळीत पवन हॉटेल चालवून आपल्या कुटुंबाचा उदरनिर्वाह करत होते. 21 मे रोजी रात्री हॉटेल बंद झाल्यानंतर कारभारी आंधळे हे संशयित आरोपी सचिन सोमनाथ राठोड आणि सुमीत पवार यांच्यासोबत दारू पीत बसले होते. दारू पित असतानाच त्यांच्यात पैशांच्या देवाणघेवाणीवरून अचानक वाद सुरू झाला. या वादाचे रूपांतर पुढे हाणामारीत झाले. संशयित आरोपी सचिन राठोड याने कारभारी आंधळे यांना घट्ट पकडून ठेवले, तर सुमीत पवार याने आपल्या जवळील धारदार चाकूने कारभारी यांच्या मानेवर आणि हातावर सपासप वार केले. या प्राणघातक हल्ल्यात गंभीर जखमी झालेले कारभारी आंधळे रक्ताच्या थारोळ्यात जमिनीवर कोसळले.

हे ही वाचा : उल्हासनगर : भररस्त्यात थरारक गोळीबार, सात राऊंड फायर; किती जणांचा गेला जीव?

संशयित आरोपीनेच दिली माहिती

घटना घडल्यानंतर संशयित आरोपी सचिन राठोड यानेच कारभारी आंधळे यांच्या लहान मुलाला फोन करून तुमचे वडील जखमी अवस्थेत पडले असल्याची माहिती दिली. घटनेची माहिती मिळताच मृताचा मोठा मुलगा ओमकेश आंधळे आणि नातेवाईक तातडीने परळी येथील अरुणोदय मार्केट लाईन परिसरातील मोकळ्या जागेत धावले. तेथे कारभारी आंधळे हे निपचित पडलेले आढळून आले. 

हे ही वाचा : पूर्वीच्या काळी सूर्यास्तानंतर अंत्यसंस्कार का केले जात नव्हते? गरुड पुराणात काय लिहिलंय?

एकाला अटक, एकजण फरार

त्यानंतर नातेवाईकांनी तातडीने पोलिसांशी संपर्क साधून त्यांना अंबाजोगाई येथील शासकीय रुग्णालयात दाखल केले. मात्र, डॉक्टरांनी त्यांना मृत घोषित केले. या प्रकरणी ओमकेश आंधळे याच्या फिर्यादीवरून परळी पोलिसांनी सचिन राठोड आणि सुमीत पवार यांच्याविरुद्ध गुन्हा दाखल केला आहे. पोलिसांनी सचिन राठोड यास ताब्यात घेतले असून सुमित पवार फरार झाला आहे. पोलीस उपनिरिक्षक नितीन गट्टूवार पुढील तपास करत आहेत.