Exclusive: नाना पाटेकरांच्या मृत्यूचे अखेरचे क्षण, डॉक्टरने सांगितली संपूर्ण कहाणी!

नाना पाटेकर यांच्यावर उपचार करणाऱ्या मणिपाल रुग्णालयातील ऑन्कोलॉजी विभागाचे प्रमुख डॉ. शेखर सालकर यांनी त्यांच्या अखेरच्या क्षणांबाबत माहिती दिली आहे.

रात्री 1.30 ते 2.30 दरम्यान तब्येत बिघडली

डॉक्टरांनी दिलेल्या माहितीनुसार, रात्री साधारण 1.30 ते 2.30 वाजण्याच्या दरम्यान नाना पाटेकर यांची तब्येत बिघडण्यास सुरुवात झाली होती. त्यांना मोठ्या प्रमाणात घाम येत होता, छातीत तीव्र वेदना होत होत्या आणि हा त्रास डाव्या हातापर्यंत जात होता. त्यांना श्वास घेण्यासही त्रास होत होता.

ही सर्व लक्षणं हार्ट अटॅकशी संबंधित असू शकतात. त्यामुळे नाना पाटेकर यांना घरीच गंभीर हार्ट अटॅक आला असण्याची शक्यता डॉक्टरांनी व्यक्त केली.

रुग्णालयात पोहोचण्यापूर्वीच मृत्यू?

डॉ. शेखर सालकर यांच्या माहितीनुसार, पहाटे सुमारे 4.18 ते 4.20 वाजण्याच्या दरम्यान त्यांच्या घरातून वैद्यकीय पथकाला माहिती देण्यात आली. पथक घटनास्थळी पोहोचले तेव्हा नाना पाटेकर जमिनीवर बेशुद्ध अवस्थेत होते आणि त्यांच्या शरीराकडून कोणतीही प्रतिक्रिया मिळत नव्हती.

हे ही वाचा>> स्टार झाला, पुरस्कार जिंकले; पण नाना पाटेकरांनी कमावलं ते काही वेगळंच…

यानंतर त्यांना रुग्णालयात आणण्यात आले. मात्र रुग्णालयात दाखल करण्यापूर्वीच त्यांचा मृत्यू झालेला होता. डॉक्टरांच्या अंदाजानुसार, त्यांचा मृत्यू त्यापूर्वीच म्हणजे साधारण 3.30 वाजताच्या आसपास झाला असावा.

45 मिनिटे CPR देऊनही हृदयाचे ठोके पूर्ववत नाही झाले

रुग्णालयात आणल्यानंतर वैद्यकीय पथकाने त्यांना वाचवण्यासाठी प्रयत्न सुरू केले. सुमारे 45 मिनिटे CPR देण्यात आला. मात्र त्यांच्या हृदयाचे ठोके पुन्हा सुरू होऊ शकले नाहीत.

हे ही वाचा>> कायम साधेपणाने जगलेले नाना पाटेकर किती कोटींचे मालक? मागे सोडली ‘एवढ्या’ कोटींची संपत्ती!

डॉक्टरांच्या म्हणण्यानुसार, आपत्कालीन परिस्थितीत रुग्णाला रुग्णालयात आणल्यानंतर वैद्यकीय प्रोटोकॉलनुसार CPR देऊन जीव वाचवण्याचा प्रयत्न केला जातो. नाना पाटेकर यांच्या बाबतीतही वैद्यकीय पथकाने शक्य ते प्रयत्न केले; मात्र त्यांना प्रतिसाद मिळाला नाही.

हार्ट अटॅक आणि कार्डियाक अरेस्टमध्ये काय संबंध?

डॉक्टरांनी हार्ट अटॅक आणि कार्डियाक अरेस्ट यातील फरकही स्पष्ट केला आहे. हार्ट अटॅक हा प्रामुख्याने हृदयाला रक्तपुरवठा करणाऱ्या रक्तवाहिन्यांमध्ये अडथळा निर्माण झाल्यामुळे होतो. काही गंभीर हार्ट अटॅकमध्ये हृदयाची इलेक्ट्रिकल रिदम बिघडू शकते आणि त्यातून कार्डियाक अरेस्ट येऊ शकतो.

मात्र प्रत्येक हार्ट अटॅकनंतर कार्डियाक अरेस्ट होतोच असे नाही. कार्डियाक अरेस्टची इतर कारणेही असू शकतात.

दिलेल्या माहितीनुसार, नाना पाटेकर यांच्या बाबतीत गंभीर हार्ट अटॅकमुळे कार्डियाक अरेस्ट झाल्याची शक्यता डॉक्टरांनी व्यक्त केली आहे. मात्र मृत्यूचे निश्चित कारण पोस्टमार्टम अहवालानंतरच स्पष्ट होईल.

फिट दिसत असलात तरी धोका टळत नाही

नाना पाटेकर हे सक्रिय आणि फिट दिसत होते, मग त्यांना अचानक हार्ट अटॅक कसा आला, हा प्रश्नही उपस्थित होतो. यावर डॉक्टरांनी स्पष्ट केले की एखादी व्यक्ती बाहेरून फिट दिसत असली तरी तिचे हृदय पूर्णपणे निरोगी आहे, याची खात्री देता येत नाही.

वाढत्या वयासोबत शरीरात काही आजार निर्माण होऊ शकतात आणि अनेकदा त्यांची सुरुवातीला स्पष्ट लक्षणे दिसत नाहीत. दिलेल्या माहितीनुसार, नाना पाटेकर यांचे वय 75 वर्षे होते आणि त्यांचा पूर्वीचा स्मोकिंगचा इतिहासही होता.

त्यामुळे केवळ बाहेरून फिट दिसणे हे हार्ट अटॅक किंवा कार्डियाक अरेस्टपासून सुरक्षित असल्याचे लक्षण मानता येत नाही.

पहिला एक तास का महत्त्वाचा?

कार्डियाक इमर्जन्सीमध्ये वेळ अत्यंत महत्त्वाचा असतो. अचानक छातीत तीव्र किंवा दाब जाणवणे, श्वास घेण्यास त्रास होणे, थंड घाम येणे, बेशुद्ध पडणे किंवा व्यक्तीची अचानक प्रतिक्रिया बंद होणे अशी लक्षणे दिसल्यास वेळ न घालवता तातडीने वैद्यकीय मदत घेणे गरजेचे आहे.

विशेषतः एखादी व्यक्ती बेशुद्ध असेल आणि सामान्यपणे श्वास घेत नसेल, तर तातडीने आपत्कालीन मदत बोलावून CPR सुरू करणे महत्त्वाचे ठरू शकते.

CPRची माहिती प्रत्येकाला असणे गरजेचे

डॉ. शेखर सालकर यांच्या म्हणण्यानुसार, कार्डियाक अरेस्टनंतर रुग्णाला रुग्णालयात पोहोचवण्यासाठी लागणारा वेळ अनेकदा अत्यंत निर्णायक ठरतो. त्यामुळे सामान्य नागरिकांना CPR कसा द्यायचा याची प्राथमिक माहिती असणे महत्त्वाचे आहे.

नाना पाटेकर यांच्या निधनाच्या घटनेतून हार्ट अटॅकची लक्षणे दिसताच तातडीने रुग्णालयात जाणे आणि कार्डियाक अरेस्टच्या वेळी त्वरित CPR सुरू करणे किती महत्त्वाचे आहे, याकडे पुन्हा लक्ष वेधले गेले आहे.