नांदेडमधील 'तलवार बाबा'ला पोलिसांनी उचललं, महिला अन् लहान मुलांना कसं गंडवायचा? कारनामे उघड

लिंबू आणि जादूटोण्याच्या नावाखाली पैशांची लूट

आरोपी ज्ञानेश्वर कर्डे हा लिंबू आणि इतर विविध प्रकारच्या गोष्टींचा वापर करून लोकांना आपल्या जाळ्यात अडकवत असे. संकटातून मुक्ती मिळवून देण्याच्या नावाखाली तो लोकांकडून मोठ्या प्रमाणात रोख रक्कम आणि मौल्यवान वस्तू उकळत असल्याचे समोर आले आहे. स्थानिक नागरिकांकडून या छळवणुकीबाबत वारंवार तक्रारी प्राप्त झाल्यानंतर पोलीस दलाने या प्रकरणाची गांभीर्याने दखल घेतली. उपविभागीय पोलीस अधिकारी श्याम पानेगावकर आणि पोलीस निरीक्षक अतुल भोसले यांच्या नेतृत्वाखालील पथकाने अत्यंत गुप्तपणे सापळा रचून ही मोठी कारवाई केली. छाप्यादरम्यान पोलिसांना घटनास्थळावरून अंधश्रद्धेशी संबंधित अनेक संशयास्पद वस्तू आणि साहित्य सापडले असून ते सर्व जप्त करण्यात आले आहे.

हेही वाचा : 'जा बेटा घरी जा..', 'बेटा' म्हणाल्याने युवकाच्या डोक्यात तिडीक गेली, थेट हॉटेल मालकाचा घेतला जीव

पोलिसांच्या या कारवाईदरम्यान आरोपीच्या काही समर्थकांनी आणि अनुयायांनी सरकारी कामात अडथळा आणण्याचा प्रयत्न केला. पोलिसांशी हुज्जत घालून कारवाई थांबवण्याचा प्रयत्न करणाऱ्या शिवकांत मेलारे आणि नबाजी वाघेकर यांच्यासह इतर काही जणांविरुद्धही पोलिसांनी कडक पावले उचलली आहेत. या सर्वांवर महाराष्ट्र जादूटोना विरोधी कायद्यांतर्गत आणि सरकारी कामात अडथळा आणल्याप्रकरणी गुन्हे नोंदवून त्यांना ताब्यात घेण्यात आले आहे. भोंदू बाबांच्या वाढत्या प्रस्थामुळे आणि त्यांच्याकडून होणाऱ्या शोषणाचे प्रकार वाढल्यामुळे प्रशासन आता अधिक सतर्क झाले आहे. बडूर गावातील या कारवाईमुळे परिसरात एकच खळबळ उडाली असून पोलिसांनी अशा ढोंगी बाबांच्या नादी न लागण्याचे आवाहन नागरिकांना केले आहे.

 अंधश्रद्धा निर्मूलन समितीकडून कारवाईचे स्वागत

'तलवार बाबा'च्या अटकेनंतर महाराष्ट्र अंधश्रद्धा निर्मूलन समितीने (अनीस) पोलीस प्रशासनाच्या या धडक कारवाईचे स्वागत केले आहे. समितीचे सदस्य कमलाकर जामदाडे यांनी प्रतिक्रिया देताना सांगितले की, लोकांमध्ये भीती पसरवून त्यांचे आर्थिक आणि मानसिक शोषण करणाऱ्या अशा ढोंगी बाबांविरुद्ध कडक कायदेशीर कारवाई होणे अत्यंत गरजेचे आहे. पोलीस निरीक्षक अतुल भोसले यांनी देखील नागरिकांना सतर्क राहण्याचा इशारा दिला आहे. जर कोणालाही आपल्या आसपास अशा प्रकारे फसवणूक होत असल्याचे आढळल्यास, त्यांनी त्वरित पोलिसांशी संपर्क साधावा असे त्यांनी म्हटले आहे. अंधश्रद्धा हा समाजाला लागलेला एक मोठा कलंक असून तो नष्ट करण्यासाठी पोलीस आणि नागरिक यांनी एकत्रितपणे काम करणे आवश्यक असल्याचे मत त्यांनी यावेळी व्यक्त केले.

इतर महत्त्वाच्या बातम्या 

Beed: तुमचंही डोकं फिरेल अशी घटना... 13 वर्षाच्या मुलाचा अडीच वर्षाच्या मुलीवर बलात्कार