पुण्याहून मालेगावला निघालेल्या खासगी बसचा भीषण अपघात, 4 प्रवाशांचा मृत्यू; 22 जण जखमी

मिळालेल्या माहितीनुसार, पुण्याहून मालेगावकडे येणारी खासगी ट्रॅव्हल बस (क्रमांक MP 70 ZC 7799) आणि महिंद्रा पिकअप (क्रमांक MH 12 JF 7422) यांची पहाटे महामार्गावर समोरासमोर धडक झाली. अपघाताची तीव्रता इतकी होती की बस आणि पिकअप दोन्ही वाहनांचे मोठ्या प्रमाणात नुकसान झाले. धडकेनंतर बसमधील प्रवासी जोरात आदळल्याने बसमध्ये एकच गोंधळ उडाला. काही प्रवासी जागीच बेशुद्ध पडले, तर काहींना गंभीर दुखापती झाल्या.

हेही वाचा : बीड : घोटाळेबाज कुटे दाम्पत्याला घेऊन जाणाऱ्या पोलीस व्हॅनला दुचाकीस्वारांनी दिली धडक, अपघातात एकाचा दुर्देवी अंत

अपघाताची माहिती मिळताच परिसरातील स्थानिक नागरिक घटनास्थळी धावून आले. त्यांनी तातडीने मदतकार्य सुरू करत जखमींना बसमधून बाहेर काढले. त्यानंतर पोलीस आणि रुग्णवाहिका घटनास्थळी पोहोचल्या. पोलिसांनी स्थानिकांच्या मदतीने जखमी प्रवाशांना तात्काळ जवळच्या रुग्णालयात दाखल केले. पहाटेची वेळ असल्याने काही काळ वाहतुकीला अडथळा निर्माण झाला होता. मात्र पोलिसांनी तत्काळ वाहतूक सुरळीत केली. या अपघातात मृत्युमुखी पडलेले चारही प्रवासी मालेगाव येथील रहिवासी असल्याची प्राथमिक माहिती आहे. अपघातानंतर बसमधील इतर प्रवाशांमध्ये भीतीचे वातावरण पसरले होते.  जखमी प्रवाशांना उपाचारासाठी रुग्णालयात दाखल करण्यात आलंय. 

पोलिसांनी दिलेल्या माहितीनुसार, जखमींपैकी 22 जणांवर उपचार सुरू असून त्यापैकी दोघांची प्रकृती गंभीर आहे. त्यांना विशेष उपचारासाठी निरीक्षणाखाली ठेवण्यात आले आहे. अपघाताचे नेमके कारण अद्याप स्पष्ट झाले नसून प्राथमिक अंदाजानुसार अंधार, वेग आणि समोरासमोर धडक ही संभाव्य कारणे मानली जात आहेत.

या संदर्भात पोलिसांनी सांगितले की, “अपघातानंतर आमची प्राथमिकता जखमी प्रवाशांना तात्काळ रुग्णालयात पोहोचवण्याची होती. सध्या सर्व जखमींवर उपचार सुरू आहेत. अपघाताची सखोल चौकशी करण्यात येत असून पुढील कारवाई तपासाअंती केली जाईल.” दरम्यान, या भीषण अपघातामुळे मालेगाव परिसरात हळहळ व्यक्त केली जात असून मृतांच्या कुटुंबीयांवर शोककळा पसरली आहे.

इतर महत्त्वाच्या बातम्या 

15 दिवसांपूर्वी पत्नीचं निधन, ठाकरेंचा शिलेदार खचला नाही, 30 वर्षांच्या संघर्षानंतर शिवसेनेने मुंबईतील 'हा' वार्ड जिंकला