Mumbai Rain: मुंबईत तुफान पाऊस, आज शाळांना सुट्टी; Red Alert मुळे BMC चा निर्णय

बृहन्मुंबई महानगरपालिकेच्या (BMC) एका अधिकाऱ्याने सांगितले की, हवामान विभागाने गुरुवारी सकाळी 8.30 वाजेपर्यंत अत्यंत मुसळधार पावसाचा अंदाज देत 'रेड अलर्ट' जारी केला आहे, त्यामुळे खबरदारीचा उपाय म्हणून सुट्टी जाहीर करण्यात आली आहे.

हे ही वाचा>> Mumbai Rain: मुंबईत भयंकर पाऊस, मध्य आणि हार्बर रेल्वे ठप्प!

बीएमसीने सांगितले की, "विद्यार्थ्यांच्या सुरक्षेचा विचार करून, बीएमसीच्या अखत्यारीतील सर्व शाळा आणि महाविद्यालये गुरुवारी बंद राहतील."

बीएमसीने नागरिकांना अत्यावश्यक असेल तेव्हाच घराबाहेर पडण्याचे आवाहन केले आहे. बुधवारी दुपारपासून मुंबई आणि उपनगरात मुसळधार पाऊस सुरू असून, सखल भागात पाणी साचले आहे. कुर्ला ते ठाणे स्थानकांदरम्यान लोकल ठप्प झाल्याने प्रवासी अडकून पडले, तर रस्त्यावरील वाहतूक संथ गतीने सुरू होती.

हे ही वाचा>> Maharashtra weather: काळजी घ्या! राज्यात पावसाचा धुमाकूळ, 'या' जिल्ह्यांना धोक्याचा इशारा!

रेड अलर्ट जारी

भारतीय हवामान खात्याने बुधवारी संध्याकाळी मुंबई आणि त्याच्या शेजारील जिल्ह्यांसाठी रेड अलर्ट जारी केला असून मुसळधार पावसाची शक्यता वर्तवली आहे. दुपारपासून शहरातील अनेक भागात पाऊस पडत आहे. महापालिकेच्या एका अधिकाऱ्याने सांगितले की, आयएमडीने मुंबईसाठी ऑरेंज अलर्ट बदलून रेड अलर्ट केला आहे, जो गुरुवारी सकाळी 8.30 वाजेपर्यंत जारी करण्यात आला आहे.

याआधी बुधवारी सायंकाळी झालेल्या मुसळधार पावसानंतर मुंबईत अनेक ठिकाणी पाणी साचले होते, त्यामुळे रस्त्यांवर वाहनांच्या लांबच लांब रांगा लागल्या होत्या.