लघुशंका करतानाचा Video झाला व्हायरल, लोकांनी छळलं; नंतर 'त्या' तरूणाने...

घटनेची पार्श्वभूमी

काही दिवसांपूर्वी, म्हणजे 30 ऑक्टोबर रोजी, छत्रपती संभाजीनगर रेल्वे स्थानकाच्या प्लॅटफॉर्मवरील पिवळ्या बोर्डखाली महेश आढे आणि त्याचा मित्र नशेत असताना लघुशंका करत होते. ही बेजबाबदार कृत्य करताना तिथे उपस्थित एका व्यक्तीने त्यांचा व्हिडिओ काढला आणि तो थेट इन्स्टाग्रामवर अपलोड केला. व्हिडिओत दोघेही नशेत असल्याचे दिसत होते, ज्यामुळे सोशल मीडियावर हा व्हिडिओ झपाट्याने व्हायरल झाला. शहरात या घटनेवर संताप व्यक्त झाला असला तरी, व्हिडिओ व्हायरल होण्याचे खरे परिणाम महेश आणि त्याच्या मित्रावरच उमटले.

व्हिडिओ व्हायरल झाल्यानंतर दुसऱ्या दिवशी, म्हणजे 31 ऑक्टोबरला, महेश आणि त्याच्या मित्राने एक माफीचा व्हिडिओ जारी केला. यात त्यांनी आपल्या कृत्याबद्दल खेद व्यक्त करून सर्वांसमोर माफी मागितली. "आम्ही नशेत असल्यामुळे असं घडलं, आम्हाला माफ करा," असं ते म्हणाले. मात्र, माफी मागितल्यानंतरही सोशल मीडियावर त्यांचा मुख्य व्हिडिओ व्हायरल होत राहिला. यात महेशचा पूर्ण पत्ता, फोन नंबर आणि वैयक्तिक माहिती जोडून शेअर करण्यात आली होती. ज्यामुळे त्यांना रोज अज्ञात नंबरवरून धमकीचे मेसेज आणि कॉल्स येत होते.

धमक्यांना त्रासाल अन् दिला जीव

व्हायरल व्हिडिओमुळे महेशला प्रचंड मानसिक त्रास सहन करावा लागत होता. काल त्याने घरी आणि जवळच्या मित्रांना असंही सांगितलं होतं की, "मला हे सगळं सहन होत नाही, मी जीव देईन." अखेर आज सकाळी साडेदहाच्या सुमारास त्याने ठोकमळ तांड्याजवळील एका विहिरीत उडी घेतली. ज्यामध्ये बुडून त्याचा दुर्दैवी मृत्यू झाला. गावकऱ्यांनी विहिरीतून त्याचा मृतदेह बाहेर काढला आणि परतूर येथील उपजिल्हा रुग्णालयात आणण्यात आला. डॉक्टरांनी त्याला मृत घोषित केले.

नातेवाईकांचा संताप, दोषींवर कारवाईची मागणी

महेशच्या आत्महत्येनंतर त्याच्या आई, भावंडे आणि नातेवाईकांनी आक्रोश व्यक्त केला. "व्हिडिओ काढणाऱ्या व्यक्तीने आणि तो व्हायरल करणाऱ्यांनी आमचा मुलगा संपवला. त्यांच्यावर गुन्हा दाखल करा," अशी मागणी त्यांनी पोलिसांकडे केली. मृतदेहाची रवानगी होताना नातेवाईकांनी घोषणाबाजी केली आणि सोशल मीडियाच्या दुरुपयोगाविरोधात जागृती करण्याची विनंती केली. परतूर तालुक्यातील आष्टी पोलीस ठाण्यात या प्रकरणात गुन्हा दाखल करण्याची प्रक्रिया सुरू आहे. व्हायरल व्हिडिओ शेअर करणाऱ्या अज्ञात व्यक्तींचा शोध घेण्यासाठी सायबर पोलिसांना सूचना देण्यात आली आहे. प्राथमिक तपासात आत्महत्या कारण व्हायरल व्हिडिओमुळे होणारा मानसिक त्रास असल्याचे निदर्शनास आले आहे.