घरात बहिणीला चाकूने भोसकले अन् नंतर आईवरही सपासप केले वार, आयटी इंजिनीअर का बनला हैवान?

हे ही वाचा : रेकॉर्डिंग डिलिट केल्याने मुलगा बनला हैवान, आईच्या तोंडात बनियनचा बोळा करुन कोंबला अन्...बदलापूरात धक्कादायक घटना

किरकोळ वादातून हत्या

मिळालेल्या माहितीनुसार, नीलिमा नावाची महिला एका आरोग्य विमा कंपनीत काम करते. त्यांची जुळी मुले, हार्दिक आणि हिमा शिखा, गुरुग्राममधील एका आयटी कंपनीत नोकरीला होती. दोघेही होळीसाठी घरी आले होते आणि शुक्रवारी पुन्हा गुरुग्रामला जाण्याच्या तयारीत होते. शुक्रवारी आई कामावर गेल्यानंतर हार्दिक आणि हिमा शिखा घरात एकटेच होते. यावेळी त्यांच्यात काही कारणावरून वाद झाला आणि रागाच्या भरात हार्दिकने हिमा शिखावर चाकूने सपासप वार केले. रक्ताच्या थारोळ्यात पडलेल्या बहिणीला सोडून तो तिथेच थांबला नाही.

ऑफिसमध्ये जाऊन आईला घेऊन आला

बहिणीची हत्या केल्यानंतर हार्दिक आपल्या आईच्या कार्यालयात पोहोचला आणि काहीतरी बहाणा करून त्यांना घरी घेऊन आला. आईने घरात पाऊल टाकताच रक्ताच्या थारोळ्यात पडलेल्या मुलीला पाहून किंकाळी फोडली. त्याच वेळी हार्दिकने आईवरही चाकूने वार करून त्यांना गंभीर जखमी केले आणि स्वतःच्या कारमधून घटनास्थळावरून पळ काढला. आजूबाजूच्या लोकांनी आरडाओरडा ऐकून धाव घेतली आणि जखमी मायलेकींना तातडीने जिल्हा रुग्णालयात दाखल केले. मात्र, डॉक्टरांनी हिमा शिखाला मृत घोषित केले, तर नीलिमा यांच्यावर उपचार सुरू आहेत.

हे ही वाचा : तरुणाच्या मृतदेहाचे पाच तुकडे अन् धड गायब, मक्याच्या शेतातलं 'ते' दृश्य बघून पोलिसही चक्रावले

आरोपी फरार

या घटनेची माहिती मिळताच पोलिसांनी घटनास्थळी धाव घेऊन तपास सुरू केला आहे. पोलिसांनी सांगितले की, प्राथमिक तपासानुसार आरोपीने घरगुती वादातून हे कृत्य केले असावे. पोलिसांनी मुलीचा मृतदेह पोस्ट मार्टमसाठी पाठवला असून फरार आरोपी हार्दिकचा शोध घेण्यासाठी पोलिसांची पथके रवाना करण्यात आली आहेत. एकाच कुटुंबातील या भीषण रक्तपातामुळे सर्वत्र हळहळ व्यक्त केली जात आहे.