Vijay Shivtare : 'मेला तर पुन्हा बाय इलेक्शन', अजित पवारांची शिवतारेंनी उडवली झोप

Baramati lok sabha elections 2024 : बारामतीमध्ये अजित पवारांनी सुप्रिया सुळेंना पराभूत करण्याचा निर्धार केला, पण आता त्यांच्यासमोर अडचणी वाढताहेत. सुनेत्रा पवारांचे नाव घोषित झाल्यानंतर शिवसेनेचे नेते विजय शिवतारे यांनी दंड थोपटले. बदला घेण्याची वेळ आलीये, असे म्हणत शिवतारे मैदानात उतरलेत. बारामती लोकसभा मतदारसंघातील त्यांच्या महत्त्वाच्या नेत्यांसोबतच्या भेटीगाठींनी अजित पवारांची चिंता वाढलीये. अशात एका मुलाखतीत शिवतारेंनी जुन्या विधानाची आठवणही पवारांना करू दिली आहे. (Vijay Shivtare on Contesting Loksabha Elections 2024 from Baramati)

टीव्ही ९ वृत्तवाहिनीला दिलेल्या मुलाखतीत विजय शिवतारे यांनी भूमिकेवर ठाम असल्याचे सांगितले. विजय शिवतारे यांनी भोर विधानसभा मतदारसंघातील काँग्रेसचे नेते अनंतराव थोपटे यांची भेट घेतली. यावेळी त्यांनी थोपटेंना पाठिंबा देण्याचे आवाहन केले. 

अनंतराव थोपटे काय म्हणाले?

"आमचा विजय शिवतारेंना आशीर्वाद आहे. ज्यावेळी आम्ही होतो, त्यावेळी शरद पवार विरोधात होते. आणि दिल्ली माझ्याबरोबर होती, अशा वेळी माझा पराभव झाला. तो कसा झाला, काय झाला.. हे सगळ्यांना माहिती आहे. आता काय झालंय की, शरद पवारांची मुलगी इथे उभी आहे. नंतर त्या अजित पवारची बायको उभी आहे. आता शिवतारे उभे आहेत", अशी भूमिका थोपटे यांनी शिवतारेंच्या भेटीनंतर मांडली.

हेही वाचा >> भाजपकडून निंबाळकरांना तिकीट, धैर्यशील पाटलांनी सांगितला पुढचा प्लॅन 

अजित पवारांचे विधान शिवतारेंच्या जिव्हारी

२०१९ च्या निवडणुकीत अजित पवार यांनी विजय शिवतारे यांना थेट आव्हान दिले होते. त्यांनी एका भाषणात केलेली टीका विजय शिवतारेंच्या जिव्हारी लागली होती. त्याचीच आठवण सांगत शिवतारेंनी अजित पवारांना ललकारलं आहे. 

मुलाखतीत बोलताना विजय शिवतारे म्हणाले की, "माझी अजित पवारांवर नाराजी नाही. माझ्या मतदारसंघामधील लोकांची नाराजी आहे. २०१९ च्या सांगता सभेमध्ये ते (अजित पवार) म्हणालेले की, मरतोय तर कशाला लढतोय? मेला तर पुन्हा बाय इलेक्शन होईल. मी हे विसरलोय, नियती त्यांना पाहून घेईन. मतदारसंघातील स्वाभिमानी मतदार मात्र हे विसरणार नाही. मला त्यांनी फोन करावा असी माझी इच्छा नाही."

पवार ही प्रवृत्ती -शिवतारे 

शिवतारे असंही म्हणाले की, "पवार ही प्रवृत्ती आहे. या प्रवृत्तीने इतरांना दाबून ठेवलेले आहे. इतरांना काम करण्याची संधी दिली पाहिजे. त्या विरोधात माझा लढा आहे. बारामतीतील मतदारांना तिसरा पर्याय दिला पाहिजे, यासाठी ज्यांनी प्रयत्न केले. त्यांना भेटणं, विश्वासात घेणं, मुख्यमंत्र्यांच्या भावना त्यांना कळवणं. या सगळ्यात, जनतेचा निर्णय महत्त्वाचा आहे", असे शिवतारेंनी थोपटेंच्या भेटीनंतर सांगितले.

हेही वाचा >> 'बंडखोरीला मान्यता दिल्यासारखे होईल', सुप्रीम कोर्टाचे निवडणूक आयोगावर ताशेरे 

निवडणूक लढवण्यावर ठाम

विजय शिवतारे यांची समजूत काढण्याचा प्रयत्न मुख्यमंत्री एकनाथ शिंदे यांनीही केला आहे. मात्र, ते निवडणूक लढवण्यावर ठाम आहेत. "बारामतीमध्ये 6 लाख 86 हजार मते पवारांच्या बाजूने आहे. त्यात 5 लाख 50 हजार विरोध मते सुद्धा आहेत. ज्यांना पवारांना मतदान करायची इच्छा नाही, त्यांना संधी उपलब्ध करून दिली पाहिजे",असे सांगत शिवतारेंनी अपक्ष निवडणूक लढवण्यात ठाम असल्याचा पुनरुच्चार केला.