संजय राऊतांना नडणाऱ्या नवनाथ बन यांच्या निवडणुकीचा निकाल आला समोर, मानखुर्दमध्ये नेमकं काय घडलं?

नवनाथ बन यांनी पहिल्यांदाच महानगरपालिकेच्या निवडणुकीत उमेदवारी स्वीकारली होती. जेव्हा भाजपने त्यांची उमेदवारी जाहीर केली, तेव्हा अनेकांनी आश्चर्य व्यक्त केले होते. मानखुर्द हा मुस्लिमबहुल परिसर असल्याने ही जागा भाजपसाठी आव्हानात्मक मानली जात होती. मात्र, मतमोजणीनंतर सुरुवातीपासूनच नवनाथ बन यांनी आघाडी घेतली आणि अखेरपर्यंत ही आघाडी कायम राखत विजय देखील मिळवला. 

मतमोजणीच्या सुरुवातीच्या फेरीत नवनाथ बन यांना 1,714 मतांसह 506 मतांनी आघाडी मिळाली होती. नंतरच्या फेरीत ही आघाडी वाढत गेली. अखेर त्यांचा 80000 मतांनी विजय झाल्याची माहिती समोर आलीये. या विजयानंतर मतदारसंघातील कार्यकर्ते आणि भाजप नेत्यांनी विजयानंतर जल्लोष साजरा केला. 

हेही वाचा : BMC Election Results 2026: मुंबईतील प्रत्येक वॉर्डचा नेमका निकाल, पाहा आता तुमचा नवा नगरसेवक कोण

नवनाथ बन यांची कारकीर्द: पत्रकार ते मुंबईचा नगरसेवक

नवनाथ बन हे मूळचे पत्रकार असून, ABP माझा या वृत्तवाहिनासाठी त्यांनी काम केले आहे. "कोण होणार मुख्यमंत्री", "नमो vs RAGA" सारख्या लोकप्रिय कार्यक्रमांमधून त्यांनी आपली ओळख निर्माण केली. गेल्या काही वर्षांत ते भाजपचे राज्य माध्यम प्रमुख म्हणून सक्रिय आहेत. निवडणुकीपूर्वी आणि निवडणुकीदरम्यान त्यांची भूमिका पक्षासाठी महत्त्वाची ठरली होती. देवेंद्र फडणवीस यांच्या रणनीतीअंतर्गत भाजपने या निवडणुकीत अनेक नव्या आणि युवा चेहऱ्यांना संधी दिली होती. नवनाथ बन हे त्यापैकी एक महत्त्वाचे नाव ठरले. हा विजय महायुतीच्या (भाजप-शिंदे सेना) मुंबईतील मजबूत कामगिरीचा एक भाग मानला जात आहे. मानखुर्दसारख्या कठीण मानल्या जाणाऱ्या जागेवर मिळालेला विजय भाजपसाठी महत्त्वपूर्ण ठरलाय. 

नवनाथ बन यांनी विजयानंतर कार्यकर्त्यांचे आणि मतदारांचे आभार मानले असून, मानखुर्दच्या विकासासाठी पूर्ण ताकद लावणार असल्याचे सांगितले आहे. बीएमसी निवडणुकीत महायुतीने एकूणच चांगली कामगिरी दाखवली असून, नवनाथ बन यांचा विजय त्यातील एक उल्लेखनीय यश म्हणून नोंदवला जात आहे.

इतर महत्त्वाच्या बातम्या 

BMC Ward-wise Results LIVE: पाहा तुमच्या वॉर्डमध्ये कोण आलं निवडून, मुंबई महापालिकेतील वॉडनुसार निकाल!