भारतात आता २४ तास घेता येणार कोरोना प्रतिबंधक लस-डॉ. हर्षवर्धन

सोमवारपासून म्हणजेच १ मार्चपासून देशभरात कोरोना प्रतिबंधक लसीकरणाचा तिसरा टप्पा सुरू झाला आहे. या लसीकरणाची मर्यादा केंद्र सरकारने वाढवली आहे. आता चोवीस तास भारतीयांना लस घेता येणार आहे. केंद्रीय आरोग्यमंत्री हर्षवर्धन यांनी ही अत्यंत महत्त्वाची घोषणा केली आहे.

केंद्र सरकारने सगळ्या राज्यांना आणि केंद्र शासित प्रदेशांना सांगितलं आहे की आयुष्मान भारत पंतप्रधान जन आरोग्य योजना, सेंट्रल गव्हर्मेंट हेल्थ स्कीम आणि स्टेट हेल्थ इन्शुरन्स योजनेत सहभागी असलेल्या सर्व खासगी रूग्णालयांनी मोठ्या क्षमतेने लसीकरण सुरू करावं. तसंच खासगी रूग्णालयांमध्येही २४ तास लसीकरण होईल असंही त्यांनी म्हटलं आहे.

हर्षवर्धन यांनी ट्विटमध्ये काय म्हटलं आहे?

“कोरोना व्हायरसला प्रतिबंध करणाऱ्या लसीकरणाची मोहीम अधिक वेगाने चालावी यासाठी सरकारने वेळेची मर्यादा रद्द केली आहे. आता देशातले नागरिक २४ तास कोरोनाला प्रतिबंध करणारी लस घेऊ शकतात. पंतप्रधान नरेंद्र मोदी यांना देशातील नागरिकांच्या आरोग्यसोबतच त्यांच्या वेळेचीही किंमत आहे. त्यामुळेच हा निर्णय घेण्यात आला आहे.”

खासगी रुग्णालयात काय सुविधा असणं आवश्यक आहे?

कोल्ड चेनची व्यवस्था आणि लसीकरणं करू शकणारे कर्मचारी

व्हॅक्सिनेशनच्या निरीक्षणासाठीची योग्य जागा

व्हॅक्सिनेशननंतर मॅनेजमेंट ऑफ एडवर्ड इव्हेंट्सची व्यवस्था

गर्दी नियंत्रणाची व्यवस्था आणि लोकांसाठीची आसन व्यवस्था

पाणी आणि सॅनिटायझरची व्यवस्था

अशी माहितीही केंद्र सरकारने दिली आहे. कोरोनाला प्रतिबंध करण्यासाठी लसीकरणाची मोहीम १ जानेवारीपासून सुरू करण्यात आली आहे. पहिल्या टप्प्यात कोविड योद्ध्यांना लस देण्यात आली.