कवठेमहाकांळ नगरपंचायतीची सत्ता राष्ट्रवादीकडे, आबांच्या आठवणीत रोहित पाटील भावूक

कर्जत पाठोपाठ कवठे महांकाळ नगरपंचायतीमध्येही राष्ट्रवादीचा विजय झाला आहे. रोहित पाटील यांनाही विजय मिळाला आहे. आर. आर. पाटील यांचे पुत्र रोहित पाटील हे विजयानंतर आबांच्या आठवणीत भावूक झालेले दिसले. रोहित पाटील यांच्या राष्ट्रवादी पॅनलला 10 तर शेतकरी विकास पॅनला 6 जागांवर विजय मिळाला आहे. एका जागी अपक्ष उमेदवार विजयी झाला आहे.

मतदानापूर्वी रोहित पाटील यांनी केलेल्या भाषणातील वक्तव्याची चर्चा सगळीकडेच सुरू होते. राष्ट्रवादी काँग्रेसच्या प्रचारसभेची सांगता रोहित पाटील यांच्या भाषणाने झाली होती. त्यावेळी रोहित यांनी त्याचे वडील आणि महाराष्ट्राचे लाडके आबा आर. आर. पाटील यांची आठवण काढली होती. ‘आमच्या मनातील पॅनल निवडलं आहे असं सर्वसामान्यांचं मत आहे. निवडणूक निकाल 19 तारखेला जाहीर होईल. त्यानंतर मला वडिलांची आठवण आल्याशिवाय राहणार नाही’ असं रोहित पाटील म्हणाले होते. आज विजयाचा आनंद त्यांच्या चेहऱ्यावर दिसत असला तरीही वडिलांच्या आठवणीत ते भावूक झालेले दिसले.

आज काय म्हणाले रोहित पाटील?

निवडणुकीच्या प्रचारात विरोधकांनी माझा बाप काढला होता. मला बालिश ठरवलं होतं. माझ्या बापाची पुण्याई आहे असंही ते म्हणाले. तसंच आज मला आबांची आठवण येत असल्याचंही त्यांनी म्हटलं आहे.

कवठेमहांकाळ – नगरपंचायत

रोहित आर आर पाटील यांनी एक हाती सत्ता मिळवली आहे. त्याच्या विरोधात सर्व पक्ष एकत्रित आले होते. 

राष्ट्रवादी –  10

शेतकरी विकास पॅनेल – 6

अपक्ष -1

कडेगाव नगरपंचायत

कडेगाव मध्ये सत्तांतर – काँग्रेसचे मंत्री विश्वजित कदम यांना धक्का. दारुण पराभव भाजपचे जिल्हा अध्यक्ष पृथ्वीराज देशमुख आणि जिल्हा परिषद माजी अध्यक्ष संग्रामसिह देशमुख यांनी केला पराभव

काँग्रेस – 5

भाजप – 11

राष्ट्रवादी – 1

खानापूर नगरपंचायत 

काँग्रेस चे विश्वजित कदम यांचे समर्थक सुहास शिंदे आणि शिवसेनेचे आमदार अनिल बाबर यांनी खानापूर मध्ये आपला गड राखला आहे.

काँग्रेस,शिवसेना विकास आघाडी – 9

जनता विकास आघाडी – 7

अपक्ष – 1 

सांगली मिरज आणि कुपवाड पोटनिवडणूक

सांगली महानगरपालिकेच्या प्रभाग 16 (अ) च्या पोटनिवडणुकीत काँग्रेसचे तौफिक हारून शिकलगार यांचा दणदणीत विजय झाला आहे. भाजपा उमेदवार अमोल गवळी यांचा 3995 मतांनी पराभव केला. या पोटनिवडणूकीत शिवसेनेचे उमेदवार महेंद्र चंडाले यांना 535 मते , तर भाजपाचे उमेदवार अमोल गवळी यांना 3434 इतकी मते मिळाली. अपक्ष उमेदवार सुरेश सावंत यांना 587 , तर उमरफारूक ककमरी 21 आणि समीर सय्यद यांना 18 मते मिळाली. तौफिक शिकलगार यांच्या विजयानंतर शिकलगार समर्थकांनी एकच जल्लोष करीत विजयोत्सव साजरा केला.