मुंबईतील दुर्घटना : ‘बीकेसी’मधील निर्माणाधीन पूल कोसळला; 13 मजूर जखमी

मुंबईतील बीकेसी परिसरात एमएमआरडीएकडून पुल उभारण्याचं काम सुरु आहे. हे काम सुरू असतानाच मोठी दुर्घटना घडली आहे. शुक्रवारी पहाटे साडेचार वाजताच्या सुमारास बीकेसी मुख्य रस्ता व सांताक्रुझ-चेंबूरला जोडणाऱ्या निर्माणाधीन पूलाचा मोठा भाग कोसळला.

दुर्घटनेची माहिती मिळाल्यानंतर पोलीस व अग्शिमन दलाने घटनास्थळी धाव घेतली. या घटनेत 13 मजूर जखमी झाले असून, काहींची प्रकृती चिंताजनक असल्याचं समजतं. जखमींना बी.एन. देसाई रुग्णालयात दाखल करण्यात आलं असून, उपचार सुरू आहेत.

या पुलावर 20 ते 25 मजूर काम करत होते. पूल कोसळला त्यावेळी काही मजूरांनी पाण्याच्या टाकीत उड्या मारल्या, तर काहींनी जीव वाचवण्यासाठी पुलाच्या सळयांना पकडल्या होत्या.