Mumbai vaccination : मुंबई ठरली देशात ‘नंबर वन’! लसीकरणाचा विक्रम; आयुक्तांनी दिली माहिती

कोरोनाच्या तिसऱ्या लाटेवर मात करण्यासाठी देशात व राज्यात लसीकरण मोहिमेला वेग देण्यात आला आहे. मुंबई महापालिकेनंही तिसऱ्या लाटेला तोंड देण्यासाठी कंबर कसली असून, इतर उपाययोजनांबरोबरच महापालिकेनं लसीकरण कार्यक्रम प्रभावीपणे राबवत एक नंबर कामगिरी केली आहे.

दुसऱ्या लाटेत निर्माण झालेल्या भयावह परिस्थितीनंतर तिसऱ्या लाटेवर मात करण्यासाठी बृहन्मुंबई महापालिका प्रशासनाने तयारी सुरू केली आहे. प्रतिबंधात्मक उपायांचा महत्त्वाचा भाग असलेल्या लसीकरण मोहिमेवर लक्ष्य केंद्रीत करत मुंबई महापालिकेनं मोठी मजल मारली आहे.

मुंबई महापालिकेच्या आयुक्त इक्बाल सिंह चहल यांनी मुंबईकरांना मोठा दिलासा देणारी माहिती दिली आहे. मुंबई जिल्ह्यात शनिवारी (४ सप्टेंबर) एकाच दिवशी 1.3 लाख नागरिकांचं लसीकरण करण्यात आल्याचं त्यांनी सांगितलं.

आयुक्त इक्बाल सिंह चहल म्हणाले, ‘मुंबईत आज (4 सप्टेंबर) 1.3 लाख लसी देण्यात आल्या आहेत. आनंदाची बाब म्हणजे बृहन्मुंबई महापालिका हद्दीतील लसीकरणासाठी पात्र असणाऱ्या एकूण नागरिकांपैकी 80 टक्के नागरिकांनी लसीचा पहिला डोस घेतला आहे’, अशी माहिती आयुक्त चहल यांनी दिली.

‘पात्र असलेल्या 30 टक्के लोकांनी दोन्ही डोस घेतले असून, लसीकरणामध्ये देशातील महत्त्वाच्या शहरांच्या यादीत मुंबई पहिल्या क्रमांकावर आहे. याबद्दल मी खासगी रुग्णालयाचे आभार मानतो. लसीकरण कार्यक्रमाला मदत करत खासगी रुग्णालयांनी सहभाग घेतला. पूर्णपणे लसीकरणाबरोबरच मास्क वापरण्याची सवय आपल्याला कोरोनाच्या संभावी तिसऱ्या लाटेपासून वाचवू शकते’, असंही आयुक्त इक्बाल सिंह चहल म्हणाले.

कोविन पोर्टलवरील माहितीनुसार मुंबईत आतापर्यंत 1,02,41,073 नागरिकांना लस देण्यात आली आहे. मुंबईत 507 केंद्रावर लसीकरण मोहिम सुरू आहे. यात 325 केंद्र सरकारी आहे, तर 182 केंद्र हे खासगी आहेत.

मुंबईतील रुग्णसंख्या…

मुंबईत मागील काही दिवसांपासून रुग्णवाढ होताना दिसत आहे. शनिवारीही (4 सप्टेंबर) ही वाढ कायम असल्याचंच आकडेवारीतून दिसून आलं. दिवसभरात 416 नवीन रुग्ण आढळून आले. तर ३८२ रुग्ण बरे होऊन घरी परतले. सध्या मुंबईचा रिकव्हरी रेट 97 टक्के असून, रुग्ण दुप्पटीचा कालावधी १,३७९ दिवस इतका आहे.

महाराष्ट्रातही लसीकरणाचा विक्रम…

मुंबईबरोबरच महाराष्ट्रातही विक्रमी लसीकरण करण्यात आलं. राज्यात दिवसभरात (4 सप्टेंबर) 12 लाख नागरिकांना लसीचे डोस देण्यात आले. महाराष्ट्र सरकारच्या आरोग्य विभागाचे अतिरिक्त मुख्य सचिव प्रदीप व्यास यांनी ही माहिती दिली. रात्री 8 वाजेपर्यंत 12 लाख 6 हजार 327 जणांना लस देण्यात आली.