डोक्यात गोळी घालून हत्या

पूजा त्यागी असं ३२ वर्षीय मृत महिलेचं नाव आहे. सकाळी 9:30 च्या सुमारास ती आपल्या खोलीत काहीतरी काम करत बसल्या होत्या. याचवेळी बारावीत शिकणारा तिचा 17 वर्षाचा पुतण्या शिवा अचानक खोलीत शिरला आणि त्याने पूजाच्या डोक्यात गोळी झाडली. गोळी लागताच पूजा रक्ताच्या थारोळ्यात जमिनीवर कोसळली आणि काही वेळातच तिचा मृत्यू झाला. गोळीबाराचा आवाज ऐकून पूजाचा नवरा धर्मेंद्र त्यागी धावत खोलीत आला, तेव्हा आरोपी शिवा हातात शस्त्र घेऊन पळताना दिसला. पूजाला वाचवण्याचा प्रयत्न करण्यात आला, मात्र तोपर्यंत तिचा मृत्यू झाला होता. यानंतर शिवा स्वत:हून पोलिसांसमोर हजर झाला.

आठ महिन्यांपूर्वी आईचा मृत्यू

यानंतर आरोपी शिवाने पोलीस चौकशीत धक्कादायक खुलासा केला आहे. त्याने सांगितले की, 'काकीसोबत त्याचे नेहमी खटके उडत असत. सुमारे आठ महिन्यांपूर्वी त्याच्या आईचा मृत्यू झाला होता, ज्यामुळे तो मानसिक तणावात होता. याच रागातून मी हे पाऊल उचलले.' आरोपीकडून पोलिसांनी हत्येसाठी वापरलेले बेकायदेशीर शस्त्र आणि काडतूस जप्त केले आहे. आरोपीचे वडील भारतीय सैन्यात कार्यरत असून, दोन दिवसांपूर्वीच ते सुटी संपवून कर्तव्यावर परतले होते, अशी माहिती ग्रामस्थांनी दिली.

हे ही वाचा : ऑनलाईन गेमिंगच्या नादात स्वत:चं आख्खं कुटुंब संपवलं, कोल्ड्रिंकमध्ये विष मिसळून कुटुंबासह प्यायला; हादरवून टाकणारं प्रकरण

चिमुकल्याचे छत्र हरपले

मृत पूजा त्यागी हिचे लग्न चार वर्षांपूर्वी धर्मेंद्र यांच्याशी झाले होते. त्यांना सहा महिन्यांचा एक लहान मुलगा आहे. या घटनेमुळे चिमुकल्याचे छत्र हरपले असून कुटुंबावर दुःखाचा डोंगर कोसळला आहे. हस्तिनापूर पोलीस आणि फॉरेन्सिक टीमने घटनास्थळावरून पुरावे गोळा केले असून मृतदेह पोस्ट मार्टमसाठी पाठवला आहे. पोलीस या प्रकरणाचा अधिक तपास करत असून आरोपीला हे बेकायदेशीर शस्त्र कोठून मिळाले, याचाही शोध घेतला जात आहे.