लग्नासाठी दबाव टाकल्याने प्रियकराने प्रेयसीची गळा आवळून केली हत्या; स्वतःच पोलिसांना फोन करून म्हणाला...

हेही वाचा : पुण्यात खळबळ! कचऱ्याच्या ढिगाऱ्यात सापडले दोन मानवी पाय, पोलिसांनी केला धक्कादायक उलगडा

दोघांमध्ये यापूर्वीही निर्माण झाला होता तणाव

मिळालेल्या माहितीनुसार, गुरुवारी सकाळी समरीनच्या लहान भावाने तिला कॉल सेंटरमध्ये सोडलं होतं. मात्र, त्यानंतर ती मेरठमधील शताब्दीनगर येथील जंगल परिसरात फिरोजसोबत गेली. तिथे दोघांमध्ये लग्नाच्या मुद्द्यावरून वाद सुरू झाला. समरीन फिरोजवर लग्न करण्यासाठी दबाव टाकत होती. याच कारणावरून दोघांमध्ये यापूर्वीही तणाव निर्माण झाला होता. गुरुवारी झालेल्या वादाचं रूपांतर भांडणात झालं. यावेळी फिरोजने समरीनचा गळा आवळून तिची हत्या केली. घटनेनंतर आरोपीने स्वतः पोलिसांना फोन केला. आपण समरीनची हत्या केल्याचं त्याने पोलिसांना सांगितलं. एवढंच नाही, तर मृतदेह ज्या ठिकाणी आहे, त्या ठिकाणाची माहितीही त्याने दिली. माहिती मिळताच मेरठ पोलिसांचं पथक घटनास्थळी पोहोचलं आणि आरोपीला ताब्यात घेतलं. घटनास्थळावरून आरोपीची दुचाकीही जप्त करण्यात आली आहे.

हेही वाचा : दुष्काळग्रस्त शेतकऱ्यांच्या मदतीला माणुसकीचा हात; अशोक ठोंबरे यांच्या हस्ते ‘आनंदाचा शिधा’ वाटप

आरोपीने स्वतः पोलिसांना फोन करून हत्येची माहिती दिल्याने चर्चा सुरू

पोलिसांनी दिलेल्या माहितीनुसार, समरीन आणि फिरोज यांच्यात यापूर्वीही अनेकदा वाद झाले होते. त्यांच्या प्रेमसंबंधांना फिरोजच्या कुटुंबीयांचा विरोध होता. यापूर्वी फिरोजच्या कुटुंबीयांनी या संबंधांबाबत पोलिसांत तक्रारही दाखल केली होती. मात्र, समाजातील काही व्यक्तींनी मध्यस्थी केल्यानंतर हा वाद मिटवण्यात आला होता. त्यानंतरही समरीन आणि फिरोज एकमेकांना भेटत होते. गुरुवारी सकाळी शताब्दीनगर परिसरातील एका शेतात महिलेचा मृतदेह पडल्याची माहिती पोलिसांना मिळाली होती. मेरठचे एसपी सिटी विनायक गोपाल भोसले यांनी दिलेल्या माहितीनुसार, सकाळी सुमारे 10 वाजता पोलिसांना यासंदर्भात फोन आला. फोन करणाऱ्या फिरोजने आपण समरीनसोबत प्रेमसंबंधात असल्याचं सांगितलं. लग्नाच्या मुद्द्यावरून झालेल्या वादानंतर तिचा गळा आवळून हत्या केल्याची माहितीही त्याने दिली.

या प्रकरणी पोलिसांनी आरोपी फिरोजला ताब्यात घेतलं असून त्याच्याविरोधात गुन्हा दाखल करण्यात आला आहे. घटनेची माहिती मिळाल्यानंतर न्यायवैद्यक पथकाने घटनास्थळी भेट देऊन पुरावे गोळा केले. त्यानंतर समरीनचा मृतदेह शवविच्छेदनासाठी पाठवण्यात आला आहे. समरीन आणि फिरोज यांच्यातील प्रेमसंबंध, लग्नाच्या मुद्द्यावरून सुरू असलेला वाद आणि त्यातून घडलेली हत्या या सर्व बाबींचा पोलीस तपास करत आहेत. आरोपीने स्वतः पोलिसांना फोन करून हत्येची माहिती दिल्याने या घटनेची चर्चा सुरू झाली आहे. सध्या आरोपी पोलिसांच्या ताब्यात असून, या प्रकरणाचा पुढील तपास सुरू आहे.