उस्मानाबाद : अवैध दारु अड्ड्यांवर पोलिसांची छापेमारी, लाखोंचा मुद्देमाल जप्त, २८ गुन्हे दाखल

उस्मानाबाद जिल्ह्यातील अवैध दारु भट्ट्यांविरुद्ध पोलिसांनी गेल्या दोन दिवसांपासून मोहीम उघडली आहे. पोलीस अधिक्षक नीवा जैन यांच्या मार्गदर्शनाखाली दोन दिवसांत पोलिसांनी उस्मानाबाद जिल्ह्यातील विविध भागांत २८ ठिकाणी छापेमारी करत लाखोंचा मुद्देमाल जप्त करत गुन्हे दाखल केले आहेत.

मंगळवारी उस्मानाबाद पोलिसांनी २८ ठिकाणी छापेमारी केली, ज्यात पिंपांमध्ये हातभट्टीत मद्यनिर्मितीसाठी वापरला जाणारा ५ हजार ८६० मिली द्रव्य पदार्थ पोलिसांनी जागच्या जागी नष्ट केला आहे. याव्यतिरीक्त पोलिसांनी 282 लि. हातभट्टी दारु, 184 बाटल्या देशी- विदेशी दारु व 24 लि. शिंदी जप्त करुन संबंधीतांविरुध्द महाराष्ट्र मद्य निषेध कायद्यांतर्गत 28 गुन्हे संबंधीत पोलीस ठाण्यात नोंदवले आहेत.

पहिल्या कारवाईत, मुरुम पोलीसांनी 6 ठिकाणी छापे टाकले असता केसरजवळगा गावातील मठामागे राणेश गायकवाड या व्यक्तीकडे 8 लि. हातभट्टीची दारु सापडली. आलूर येथे शंकर राठोड हे 20 लि. हातभट्टी दारु तर चंद्रकांत गवंडी हे 14 लि. हातभट्टी दारुसह पोलिसांना सापडले. याव्यतिरीक्त चनाप्पा क्षिरसागर हे 20 लि. हातभट्टी दारुसहीत, तर गंगुबाई धुमाळ यांच्याकडेही पोलिसांना 22 लि. हातभट्टीची दारु सापडली. तसेच मुरुम येथील मिर्झा भुखंडावर हुसणय्या तेलंग यांच्याजवळ 15 लि. शिंदी सापडली.

भयंकर घटना! मित्रासोबत बसस्थानकात बसलेल्या महिलेवर सामूहिक बलात्कार

दुसरीकडे उस्मानाबद ग्रामीण पोलिसांनी येडशी गावातील ठाकरे वस्ती तर बावी गावातील एका पानटपरीवर कारवाई करत हातभट्टीची दारु हस्तगत केली. तिसऱ्या कारवाईत, वाशी पोलिसांनी लाखनगाव, सरमकुंडी आणि सोनेवाडी येथे कारवाई करत दारुच्या बाटल्या हस्तगत केल्या. याव्यतिरीक्त कळंब, आनंदनगर, भूम, बेंबळी, उस्मानाबाद शहर, उमरगा, अंबी, तुळजापूर, ढोकी, लोहारा या भागांमध्येही पोलिसांनी धडक कारवाई करत हातभट्टीची दारु बाळगणाऱ्यांना अटक केली आहे. पोलिसांच्या या कारवाईमुळे अवैध दारु उद्योग करणाऱ्यांचे धाबे दणाणले आहेत.

उल्हासनगर : घरफोडी करुन २२ लाखांचं सोनं-चांदी लंपास