सचिन वाझेवर होणार ‘ही’ शस्त्रक्रिया, भिवंडीतील रुग्णालयात पोलिसांचा मोठा बंदोबस्त

भिवंडी: अँटेलिया कार आणि मनसुख हिरेन हत्या प्रकरणातील मुख्य आरोपी सचिन वाझे याच्यावर लवकरच शस्त्रक्रिया होणार असून त्याला भिवंडी येथील एस. एस. रुग्णालयात दाखल करण्यात आलं आहे. यावेळी इथे मोठ्या प्रमाणात पोलीस बंदोबस्त देखील ठेवण्यात आला आहे. मिळालेल्या माहितीनुसार सचिन वाझेवर एंजोप्लास्टी किंवा ओपन हार्ट सर्जरी केली जाण्याची शक्यता आहे.

मिळालेल्या माहितीनुसार, 27 ऑगस्ट रोजी एस एस हॉस्पिटलचे असिस्टंट आर एम ओ फुरकान यास आरोपी सचिन वाजे यांचे नातेवाईक येऊन भेटले यावेळी त्यांनी त्याच्या उपचाराची फाईल दाखविली. त्यानंतर संबंधित डॉक्टरांशी बोलून फुरकान यांनी वाझेच्या उपचारासाठी संमती पत्र उपलब्ध करून दिले.

त्यानंतर 30 ऑगस्ट रोजी न्यायालयाने त्याबाबत ऑर्डर करून सचिन वाझेला उपचारासाठी हॉस्पिटलमध्ये ॲडमिट करण्याचे आदेश दिले. त्याप्रमाणे 31 ऑगस्ट रोजी सचिन वाझेला दुपारी पावणे दोन वाजेच्या सुमारास उपचारासाठी एस. एस. हॉस्पिटलमध्ये आणण्यात आलं.

इथे डॉक्टर विनीत रणवीर यांनी त्याची तपासणी केली. ज्यामध्ये वाझेच्या रक्तातील साखर वाढल्याचं त्यांनी सांगितलं. दरम्यान, 29 ऑगस्टला जे.जे.हॉस्पिटल येथे वाझेचे ब्रेन एमआरआय देखील करण्यात आले होते. ज्याचे रिपोर्ट हे नॉर्मल असल्याचे डॉक्टरांनी सांगितलेले आहे.

दरम्यान, आरोपी सचिन वाझेवर 2डी इको आणि अँजोग्राफी करुन त्याच्यावर अँजोप्लास्टी किंवा ओपन हार्ट सर्जरी करायची याबाबत लवकरच निर्णय घेण्यात येणार आहे.

वाझेसाठी रुग्णालयात अत्यंत कडक बंदोबस्त

आरोपी सचिन वाजे याच्यासाठी रुग्णालयात एक विशेष खोली तयार करण्यात आली आहे. जी मुळात आयसीयू रूम आहे. सदर रूमच्या आत व बाहेर सीसीटीव्ही कॅमेरे बसवण्यात आले आहेत. तसेच रूममध्ये आणि बाहेर जेल, स्थानिक पोलीस स्टेशन, गुन्हे अन्वेषण विभाग यांचा कडक बंदोबस्त ठेवण्यात आलेला आहे.

सचिन वाझेंची कारकीर्द: एन्काउंटर स्पेशालिस्ट ते शिवसेना प्रवेश

आरोपी असलेल्या रूममध्ये कोणालाही मोबाईल फोन घेऊन जाण्यास मनाई करण्यात आली आहे. तसेच हॉस्पिटलचे डॉक्टर ,नर्स ,स्टाफ बंदोबस्तावरील पोलीस अधिकारी व अंमलदार यांना योग्य त्या सूचना देण्यात आलेल्या आहेत.

दरम्यान, या शस्त्रक्रियेच्या निमित्ताने आता पुढील काही दिवस तरी वाझे हा जेल बाहेरच असणार आहे.

अँटेलिया प्रकरण, वाझेंची अटक आणि पांढऱ्या इनोव्हा कारचा नेमका संबंध काय?

25 फेब्रुवारी 2021 रोजी मुकेश अंबानी यांच्या अँटेलिया निवासस्थानाच्या बाहेर एक स्कॉर्पिओ कार उभी करण्यात आली होती. ज्यामध्ये जिलेटीन कांड्या आणि अंबानींच्या नावे धमकीचं पत्र मिळालं होतं.

जेव्हा पोलिसांनी सुरुवातीला या प्रकरणाचा तपास केला तेव्हा त्यांना सीसीटीव्ही फुटेजमध्ये स्कॉर्पिओ कार पार्क केल्यानंतर त्या कारमधील संशयित व्यक्ती ही मागेच असणाऱ्या एका दुसऱ्या इनोव्हा कारमध्ये बसून निघून गेल्याचं पाहायला मिळालं होतं.

या सगळ्या दरम्यान, स्कॉर्पिओ कारचे मालक मनसुख हिरेन यांचा मृतदेह 5 मार्च 2021 रोजी मुंब्र्यातील खाडीत आढळून आला होता. त्यानंतर पहिल्यांदाच पोलीस अधिकारी सचिन वाझे यांच्यावर गंभीर आरोप झाले होते. या दोन्ही प्रकरणात सचिन वाझेला अटक करण्यात आलेली आहे.