मुंबईच्या गुंडगिरीला सातारी हिसका सोसणार नाही; शिवेंद्रसिंहराजेंचा शिंदेंना गर्भित इशारा

–इम्तियाज मुजावर, सातारा

‘हिशोब चुकते करण्याची भाषा शशिकांत शिंदे यांनी करू नये. मी तुमचे आव्हान स्वीकारले आहे. यापुढे दोन हात करण्याची तयारी ठेवा. तुमच्या पराभवाचे खापर माझ्यावर फोडू नका, मुंबईच्या गुंडगिरीला सातारी हिसका सोसणार नाही. यापुढे तुमची दहशत गुंडगिरी जावळी तालुका चालून देणार नाही. तुमच्या पराभवाला तुमचा जावळीतील अनावश्यक हस्तक्षेपच जबाबदार आहे’, असा घणाघात सातारा-जावळीचे आमदार शिवेंद्रसिंहराजे भोसले यांनी केला. ते जावळी येथील सोनगावमध्ये बोलत होते.

सातारा जिल्हा बँक निवडणुकीत ज्ञानदेव रांजणे हे विजयी झाले. त्यांचा सोनगाव येथे सत्कार सोहळा आयोजित करण्यात आला होता. सातारा येथे आमदार शशिकांत शिंदे यांनी पत्रकार परिषद घेऊन माझ्या पराभवाला शिवेंद्रसिंहराजे भोसले जबाबदार असल्याचा आरोप केला होता. या आरोपाला शिवेंद्रसिंहराजे भोसले यांनी जोरदार प्रत्युत्तर देत शशिकांत शिंदे यांच्यावर टीकास्त्र डागलं.

जिल्हा बँक निवडणूक: मला हद्दपार करण्याचा प्रयत्न, व्याजासकट परतफेड करणार – आमदार शशिकांत शिंदे

भोसले म्हणाले, ‘शशिकांत शिंदे केवळ बागलबच्चे आहेत आणि त्यांच्या गुंडगिरीच्या दहशतीच्या राजकारणामुळे या निवडणुकीत पराभूत झाले. रांजणे यांच्या विजयामुळे जावळीत नवी सुरुवात झाली आहे. यापुढे मी जावळी तालुक्यातील सर्व निवडणुका कोणतीही राजकीय तडजोड न करता मोठ्या ताकतीने त्यांच्याविरोधात लढणार आहे’, असा इशाराही शिवेंद्रराजेंनी दिला.

सातारा जिल्हा बँक निवडणूक : रांजणे छोटे कार्यकर्ते, बोलवता धनी वेगळा – शशिकांत शिंदेंची टीका

‘रांजणे यांचा विजय हा जावळीतील मतदारांनी ठरवून केलेला विजय आहे. जावळीतील दहशत मोडून काढण्यासाठीचाच हा विजय आहे. शिंदे यांनी आजपर्यंत अभयसिंहराजे भोसले यांच्या नावाचा वापर केवळ निवडणुकी पुरताच केला आहे. पक्षवाढीसाठी पक्षाच्या चौकटीत राहून काम केले म्हणता आणि दुसरीकडे पक्षातच गटबाजी करून पाडपाडीचे धंदे करता. राजेशाही थाटाचा आमच्यावर आरोप केला गेला; मात्र प्रत्यक्षात शिंदे साहेब राजेशाही थाट तर तुमचा मोठा आहे,’ अशी टीका शिवेंद्रसिंहराजे यांनी केली.

सातारा जिल्हा बँकेत शिवेंद्रराजेंनी शशिकांत शिंदेंचा ‘करेक्ट कार्यक्रम’ कसा केला?

‘आम्ही सर्वसामान्य आहोत आणि तुम्हीच स्वतः राजेशाही थाटात राजकारण करत आहात. तुमच्या राजेशाहीचा अतिरेक झाला, त्यामुळेच तुम्हाला पराभवाला सामोरं जावं लागलं. स्वतःच्या अपयशाचे खापर दुसऱ्यावर फोडायचे असले धंदे आता बंद करा, वस्तुस्थिती स्वीकारा. जावळी तालुक्यात आता आरपारची लढाई सुरू झाली आहे. त्यामुळे या लढाईत काहीही झालं तरी आता तडजोड करणार नाही. दोन हात करण्याची तयारीही ठेवली आहे. गुंडगिरी दाखवण्याचा प्रयत्न केला, तर सातारी हिसका देखील तुम्हाला सहन करावा लागेल’, असा इशारा आमदार शिवेंद्रसिंहराजे भोसले यांनी शशिकांत शिंदे यांना दिला.