Shivsena नेत्या उर्मिला मातोंडकर Chiplun पूरग्रस्तांच्या भेटीला

चिपळूणमधील महाप्रलयाची स्थिती मी टीव्हीवर पाहिली त्यावेळी माझे मन खूप दुःखी झालं. त्यावेळेला मी कोलकात्याला होते. त्याच वेळेला मी ठरवले आपण कोकणात मदत घेऊन जायचं. कोकणवासीयांना मदत करायची. कोकणातील चिपळूणची परिस्थिती खूप भीषण आहे. मात्र कोणी तरी पुढाकार घेऊन मदत करणे गरजेचे आहे, तीच मदत घेऊन मी आले, असं उर्मिला मातोंडकर यांनी चिपळूणमध्ये पोहोचल्यावर सांगितलं होतं.

चिपळूणमध्ये यावर्षी प्रचंड पाऊस झाला. सुमारे तीन ते चार दिवस सुरू असलेल्या पावसाने चिपळूणमध्ये दाणादाण उडवली. 24 जुलैला तर अशी परिस्थिती होती की 36 तास उलटूनही पुराचं पाणी ओसरलं नव्हतं. अनेक ठिकाणी पाच ते सहा फूट पाणी साठलं होतं. बरेच नागरिक हे पहिल्या किंवा दुसऱ्या मजल्यावर अडकून पडले होते. 25 जुलैपासून हळूहळू पाणी ओसरण्यास सुरूवात झाली. या भागात नुकसान हे मोठ्या प्रमाणात असल्याने येथील नागरिकांना त्यातून सावरण्यासाठी बराच काळ लागणार आहे.

शासनाकडून, स्वयंसेवी संस्थांकडून, कलाकारांकडून या ठिकाणी मदत पोहचवली जाते आहे. आज उर्मिला मातोंडकर यांनीही या भागाचा दौरा केला आणि मदत पोहचवली. या ठिकाणी निर्माण झालेली परिस्थिती पाहून त्यांच्याही डोळ्यात पाणी आलं.