Sidhu Moose wala Murder Case : संतोष जाधवचं नवं कनेक्शन, माहितीने पुणे पोलिसांची उडवली झोप

सिद्धू मुसेवाला प्रकरणामुळे पुणे पोलिसांच्या रडारवर आलेल्या संतोष जाधवचे एक-एक कारनामे आता समोर येऊ लागले आहेत. या प्रकरणात केलेल्या तपासातून पोलिसांना धक्कादायक माहिती मिळाली असून, त्याच्या टोळीतील सदस्यांची धरपकड पोलिसांकडून केली जात आहे. यात आता पोलिसांनी काही जणांना अटक केली असून, तब्बल १३ पिस्तुलांसह एक बोलेरो गाडीही जप्त केली आहे.

पुणे पोलिसांनी आतापर्यंत केलेल्या तपासातून संतोष जाधव आणि लॉरेन्स टोळीतील लॉरेन्स डिसोझा यांच्यातील कनेक्शनबद्दलची माहिती मिळाली आहे. त्यामुळे संतोष जाधवमुळे पुणे परिसरात पसरत चाललेल्या लॉरेन्स बिश्नोई गँगचा बिमोड करण्याचं आव्हान आता पोलिसांसमोर उभं ठाकलं आहे.

संतोष जाधवचं खंडणीप्रकरण कसं आलं समोर?

नारायणगाव पोलीस स्टेशन हद्दीतील इंदिरानगर (ता. जुन्नर, जि. पुणे)येथील वॉटर प्लांट व्यावसायिक फिर्यादीस ५ ते ६ महिन्यांपूर्वी गुन्हेगारी पार्श्वभुमी असणाऱ्या संतोष जाधव याने व्हॉटस् अपवर व्हॉईस कॉल करून ५० हजार रूपये हप्ता मागितला होता. हप्ता दिला नाही तर गोळ्या घालून मारून टाकण्याची धमकी दिली होती.

मात्र फिर्यादीने घाबरून कोठेही तक्रार दिली नव्हती. त्यानंतर २४ मे २०२२ रोजी संतोष जाधव याने पुन्हा फिर्यादीस व्हॉटस्अॅप कॉल करून ५० हजार रूपयांची मागणी केली. संतोष जाधवने एकाला फिर्यादीच्या वॉटर प्लांटवर पाठवून पुन्हा जिवे मारण्याची धमकी देऊन पैशांची मागणी केली होती.

मुसेवाला हत्या प्रकरणातील संशयित आरोपी संतोष जाधवचे गवळी गँगशी संबंध? काय म्हणाल्या आशा गवळी?

त्यावेळीही फिर्यादीने घाबरून कोठेही तक्रार दिली नाही. दरम्यान, पोलिसांनी काही दिवसांपूर्वी संतोष जाधव याला अटक केल्याची बातमी कळल्यानंतर त्या फिर्यादीने नारायणगाव पोलीस स्टेशनमध्ये घडलेल्या घटनेची सविस्तर तक्रार दिली. तक्रारीवरून नारायणगाव पोलीस स्टेशनमध्ये खंडणीचा गुन्हा दाखल करण्यात आला.

पोलिसांनी संतोष जाधवच्या कोणत्या पंटर्संना ठोकल्या बेड्या?

मंचर पोलीस स्टेशनमध्ये दाखल मोक्का गुन्ह्यातील आरोपी संतोष जाधव याने खंडणी मागण्याकरिता कुणाला पाठविलं होतं याची माहिती आरोपीकडून घेतली. संतोष जाधवने दिलेल्या माहितीनुसार जिवनसिंग दर्शनसिंग नहार (वय २३ वर्षे, रा. मंचर) व श्रीराम रमेश थोरात (वय ३२ वर्षे, रा. मंचर) यांना अटक केली.

पोलिसांनी जिवनसिंग नहार याच्याकडून १ गावठी पिस्टल व २ मोबाईल फोन, तसेच श्रीराम थोरात याच्याकडून १ गावठी पिस्टल व १ मोबाईल फोन जप्त केला. त्यांना न्यायालयासमोर हजर केले असता ६ दिवसांची पोलीस कोठडी सुनावण्यात आली.

आईने डोळ्यासमोर घेतलं होतं पेटवून; सिद्धेश कांबळे सौरभ महाकाळ कसा बनला?

कोठडीत दोघांची चौकशी केल्यानंतर त्यांनी पोलिसांना सांगितलं की, “संतोष जाधव याने जयेश रतिलाल बहिराम (वय २४ वर्ष, रा. घोडेगाव) व त्याच्या साथीदाराला मध्यप्रदेशातील मनवर येथे गावठी पिस्टल आणण्यासाठी पाठविले होतं.”

असा रचला होता खंडणीचा कट

गावठी पिस्टल आणल्यानंतर संतोष जाधव याने सांगितल्याप्रमाणे वैभव ऊर्फ भोला शांताराम तिटकारे (वय १९ वर्ष, रा जळकेवाडी, चिखली), रोहित विठ्ठल तिटकारे (वय २५ वर्षे, रा. सरेवाडी, नायफड), सचिन बबन तिटकारे (वय २२ वर्षे, रा. धाबेवाडी, नायफड), जिशान इलाईबक्श मुंढे (वय २० वर्षे, रा. घोडेगाव), जिवनसिंग दर्शनसिंग नहार, श्रीराम रमेश थोरात, १ विधी संघर्षग्रस्त बालक यांच्यासोबत आरोपींनी मिळून कट रचला. जीवनसिंग नहार, श्रीराम थोरात व विधी संघर्षग्रस्त बालक यांना खंडणीची रक्कम आणण्यासाठी पाठवायचं, असं ठरलं.

त्यानुसार जिवनसिंग नहार, श्रीराम थोरात व विधीसंघर्षग्रस्त बालक यांनी बोलेरो गाडीतून जाऊन खंडणीची मागितली. खंडणी मागितल्याचं निष्पन्न झाल्यानंतर पोलिसांनी जयेश बहिरम याच्या घराची झडती घेतली, असता त्याच्या जवळ ५ गावठी पिस्टल व १ मोबाईल अशा वस्तु मिळाल्या.

Sidhu Moose Wala वर गोळ्या झाडणाऱ्या पुण्यातल्या संतोष जाधवची आई म्हणते……

पोलिसांनी त्याला ताब्यात घेतले असून, त्यानंतर त्याने जिशान मुंढे यास १ गावठी पिस्टल दिले असल्याची माहिती दिली. जिशान मुंढे याच्याकडूनही १ गावठी पिस्टल व १ मोबाईल फोन पोलिसांनी जप्त केला. वैभव ऊर्फ भोला शांताराम तिटकारे याच्याकडे १ गावठी पिस्टल दिल्याची माहिती मिळाली. त्यावरून वैभव ऊर्फ भोला तिटकारे याच्याकडूनही पोलिसांनी १ गावठी पिस्टल व १ मोबाईल जप्त केला.

सचिन बबन तिटकारे याच्याकडे १ गावठी पिस्टल दिल्याची माहिती चौकशीतून समोर आली. त्यावरून सचिन तिटकारे याच्याकडून १ गावठी पिस्टल व १ मोबाईल फोन हस्तगत केला. रोहित तिटकारे याच्याकडून ३ गावठी पिस्टल,१ मॅक्झिन, १ बुलेट कॅरियर, १ बॅग आदी साहित्य जप्त करण्यात आलं. या सर्वांना पोलिसांनी अटक केलं आहे.

पोलिसांनी आतापर्यंत १३ गावटी पिस्टल, १ बुलेट कॅरियर व १ मॅक्झिन अशा वस्तू जप्त केल्या आहेत. तसेच गुन्हा करण्याकरिता वापरलेली बोलेरो गाडी (एचआर ०७ ए.डी.०६८५) जप्त केली आहे.

पोलीस आणखी या गुन्ह्याचा तपास करत असून, स.पो.नि.श्री. ताटे, नारायणगाव पोलीस स्टेशन हे गुन्हयाचा पुढील तपास करीत आहेत. यापुढे देखील पुणे ग्रामीण पोलीसांकडून संतोष जाधव याच्या संपर्कात असणाऱ्या मुलांची कसून चौकशी करण्यात येणार आहे.

Sidhu Moose Wala Case: वेश बदलून गुंगारा देणाऱ्या संतोष जाधवचा ठिकाणा पोलिसांनी कसा शोधला?

संतोष जाधवचा डिसोझाच्या गावात मुक्काम

पोलिसांनी केलेल्या तपासात संतोष जाधव आणि लॉरेन्स डिसोझा हे नवं कनेक्शन समोर आलं आहे. संतोष जाधव हा लॉरेन्स डिसोझाशी तीन वर्षाआधी संपर्कात आला होता. सोशल मीडियाच्या माध्यमातून त्याने लॉरेन्सशी संबंध साधला. इतकंच नाही तर संतोष जाधव लॉरेन्सच्या गावी राहुनही आला असल्याची धक्कादायक माहिती पोलिसांच्या तपासातून समोर आली आहे. बिश्नोई गँग ही सात ते आठ राज्यामध्ये पसरली असल्याचं पोलिसांनी सांगितलं.

समोर येण्याचं पोलिसांचं आवाहन

पुणे ग्रामीण पोलीसांकडून संतोष जाधव याने वा त्याच्या नावाने इतर कुणी खंडणीची मागणी केली असल्यास अथवा इतर काही तक्रार असल्यास त्याबाबत नजिकच्या पोलीस स्टेशनला तक्रार देण्याचं आवाहन केलं आहे.