अहिल्यानगर जिल्हा बँकेच्या अध्यक्षपदी सुजय विखे, उपाध्यक्षपदी देशमुख; विखे-थोरात एक्स्प्रेस जोरात!

सुजय विखे पाटील यांनी सर्व संचालकांचे आभार

निवडीनंतर नवनिर्वाचित अध्यक्ष डॉ. सुजय विखे पाटील यांनी सर्व संचालकांचे आभार मानले. संचालकांच्या सहकार्यामुळे आपली बिनविरोध निवड झाल्याचे त्यांनी सांगितले. आगामी काळात शेतकऱ्यांचे प्रश्न सोडवण्याला प्राधान्य दिले जाईल, अशी ग्वाहीही त्यांनी दिली. जिल्हा बँकेच्या माध्यमातून शेतकऱ्यांच्या प्रश्नांवर काम करण्याचा प्रयत्न राहणार असल्याचे त्यांनी स्पष्ट केले. दरम्यान, जिल्हा बँकेच्या निवडीत विखे आणि थोरात हे एकत्र आल्याने जिल्ह्याच्या राजकीय वर्तुळातही या घडामोडीची चर्चा सुरू झाली आहे. दोन्ही नेत्यांमधील समन्वयामुळे जिल्हा बँकेच्या कारभारात सहकार विकास पॅनलला एकत्रितपणे काम करण्याची संधी मिळाली आहे.

हेही वाचा : कल्याण हादरले, तरुणाने जन्मदात्या वडिलांवर अन् सख्ख्या भावावर झाडल्या गोळ्या, नेमकं काय घडलं?

जिल्हा बँक ही सर्वसामान्य माणसांची बँक असून ती टिकली पाहिजे - बाळासाहेब थोरात 

माजी महसूलमंत्री बाळासाहेब थोरात यांनीही जिल्हा बँकेच्या निवडीवर प्रतिक्रिया दिली. जिल्हा बँक ही सर्वसामान्य माणसांची बँक असून ती टिकली पाहिजे, अशी भूमिका त्यांनी मांडली. सध्या जिल्ह्यात दुष्काळी परिस्थिती असल्याने शेतकऱ्यांच्या प्रश्नांचा विचार करणे गरजेचे आहे, असे ते म्हणाले. त्यामुळेच राजकारण बाजूला ठेवून शेतकऱ्यांच्या हितासाठी एकत्र आल्याचे थोरात यांनी स्पष्ट केले. जिल्हा बँकेची निवडणूक बिनविरोध व्हावी, यासाठी प्रयत्न करण्यात आले होते. मात्र, काही ठिकाणी निवडणूक झाली. आता निवडणुकीनंतर सर्वांनी एकत्र येऊन काम करण्याची गरज असल्याचेही त्यांनी सांगितले. जिल्हा बँक सर्वसामान्यांसाठी महत्त्वाची असल्याने तिचे अस्तित्व टिकवणे आणि शेतकऱ्यांच्या हिताचा विचार करणे आवश्यक असल्याचे त्यांनी नमूद केले.

दरम्यान, जिल्हा बँकेच्या अध्यक्ष आणि उपाध्यक्षपदाच्या निवडीमुळे सहकार विकास पॅनलने आपली सत्ता कायम राखली आहे. 21 पैकी 18 जागा जिंकणाऱ्या या पॅनलने दोन्ही महत्त्वाच्या पदांवर बिनविरोध निवड करून आपले वर्चस्व सिद्ध केले आहे. विखे आणि थोरात यांच्यातील राजकीय समन्वयामुळे जिल्ह्याच्या सहकार क्षेत्रात नवे समीकरण निर्माण झाले आहे. मात्र, या एकत्रित नेतृत्वाकडून आगामी काळात दुष्काळग्रस्त शेतकऱ्यांचे प्रश्न, सहकारी संस्थांचे प्रश्न आणि ग्रामीण अर्थव्यवस्थेशी संबंधित विषयांवर कोणते निर्णय घेतले जातात, याकडे लक्ष लागले आहे. राजकीय मतभेद बाजूला ठेवून शेतकऱ्यांच्या हितासाठी एकत्र आल्याची भूमिका थोरात यांनी मांडली आहे. त्यामुळे विखे आणि थोरात यांची ही एकजूट जिल्हा बँकेच्या आगामी कारभारात कशा प्रकारे दिसून येते, हे महत्त्वाचे ठरणार आहे.