वर्धा: ‘त्या’ रुग्णालयात सापडल्या आणखी काही कवट्या, नेमकं प्रकरण काय?

सुरेन्द्र रामटेके, वर्धा: अल्पवयीन मुलीचे लैंगिक शोषण करुन तिचा अवैधरित्या गर्भपात केल्याचं प्रकरण वर्धा जिल्ह्यात समोर आलं होतं. त्याप्रकरणी डॉक्टर रेखा कदम हिला अटक करण्यात आलं होतं. पण तिच्या अटकेनंतर या प्रकरणाने आता वेगळंच वळण घेतलं आहे. रेखा कदम हिच्या रुग्णालय परिसरातून मोठ्या कवट्या आणि हाडं सापडत आहेत. आता पुन्हा एकदा काही कवट्या आणि हाडं आढळून आल्याने संपूर्ण वर्धा जिल्ह्यात या प्रकरणाची जोरदार चर्चा सुरु आहे.

संपूर्ण राज्यात खळबळ उडवणाऱ्या आर्वी शहरात अल्पवयीन मुलीचा गर्भपात केल्याप्रकरणी पोलिसांच्या रडारवर आलेल्या कदम रुग्णालयात काल (14 जानेवारी) पुन्हा खोदकाम करण्यात आले. सुमारे पाच तास रुग्णालय परिसरात हे खोदकाम सुरु होते. शोधकार्यात पुन्हा एक कवटीसारखा अवयव आढळल्याची माहिती पोलीस निरीक्षक यांनी दिली आहे.

तसेच ब्लड सँपलसह काही साहित्य मिळाले आहे. याबाबत वर्धा आणि नागपूर येथील फॉरेन्सिक टीमने रुग्णालयाची पूर्ण पाहणी सुद्धा केली आहे. याआधी रुग्णालय परिसरातील गॅस चेंबरमध्ये 11 कवट्या आणि 54 हाडे सापडली होती. आतापर्यंत या परिसरातून 12 कवट्या आणि 54 हाडे आढळली आहे.

रुग्णालयाच्या इमारतीच्या पाठीमागे असलेल्या गोबर गॅस टाकीत 11 कवट्या आणि 54 हाडं असं बायोमेडिकल वेस्ट (जैविक कचरा) सापडल्याने याआधी इथे आणखी अवैध प्रकार घडल्याचा संशय बळावला आहे.

वर्धा: 17 वर्षीय मुलाकडून बलात्कार, 13 वर्षीय मुलगी गरोदर; गर्भपात करणाऱ्या महिला डॉक्टरला अटक

डॉक्टरांची सासू आणि नर्सही ताब्यात

पोलिसांनी उपजिल्हा रुग्णालयाचे वैद्यकीय अधिकारी पथक आणि पालिका पथकाला पाचारण करुन डॉ. रेखा कदम यांच्या रुग्णालयामागील परिसरात खोदकाम केले असता जमिनीत पुरलेले भ्रूण अवषेशांसह आढळून आले होते. या प्रकरणी रुग्णालयाची परिचारिका संगीता काळे आणि डॉक्टरांची सासू शैलजा कदम यांना सुद्धा ताब्यात घेण्यात आले होते.

रुग्णालयामागील खड्डा बायोगॅस प्रकल्पाचा होता. मात्र, तो वापरात नसल्याने या खड्ड्यात इतर वेस्टेज साहित्य टाकले जात होते. पंचांसमक्ष अनेक बाबी जप्त केल्या असून जप्त करण्यात आलेले अवशेष डीएनए टेस्टसाठी पाठवण्यात येणार आहेत. तसेच हाडांचे अवशेष जनावरांचे की माणसांचे ही बाब अहवाल प्राप्त झाल्यावरच कळेल.

वर्ध्यातल्या रूग्णालयामागे 11 कवट्या आणि 54 हाडं मिळाल्याने खळबळ, महिला डॉक्टर आणि नर्सही ताब्यात

नेमकं प्रकरण काय?

वर्धा जिल्ह्यातील आर्वी शहरात राहणाऱ्या संबंधित अल्पवयीन मुलीवर तिच्याच शेजारी राहणाऱ्या अल्पवयीन मुलाने बळजबरीने शारिरीक संबंध प्रस्थापित केले. यातून ती अल्पवयीन मुलगी गरोदर राहिली. मुलीच्या पोटात अचानक दुखू लागल्याने तिचे आई वडील तिला डॉक्टरकडे घेऊन गेले असता ही बाब उघडकीस आली.

मुलगी गरोदर असल्याचे कळताच अल्पवयीन आरोपी आणि त्याच्या आई वडिलांनी मुलीच्या आई वडिलांना गर्भपात करण्यास सांगितले. तसेच याची पोलिसांकडे वाच्यता केल्यास सर्व गावात बदनामी करु असे धमकावले. मुलगी केवळ 13 वर्षाची असून मुलीची आणि आपली बदनामी होऊ नये म्हणून मुलीच्या आई वडिलांनीही त्यांचे म्हणणे ऐकले. त्यानुसार स्त्री रोग तज्ज्ञ डॉ. रेखा कदम यांच्या दवाखान्यात मुलीचा बेकायदेशीररित्या गर्भपात करण्यात आला. यासाठी मुलाच्या घरच्यांनी 30 हजार रुपये दिले.