'भाजपमध्ये ये अन्यथा काही करुन टाकू', ऑफर, धमक्या, पहिल्यांदा गौप्यस्फोट

भाजपात बलात्कार प्रकरणातील आरोपींना समर्थन दिले जात असल्याचा आरोप 

पत्रकार परिषदेत शिक्षणमंत्र्यांबाबतही दिपके यांनी भाष्य केले. प्रियंका गांधी यांनी संसदेत आणि त्यानंतर माध्यमांशी बोलताना केलेल्या विधानाचा उल्लेख करत त्यांनी संबंधित क्लिप पाहिल्याचे सांगितले. बिल्किस बानो प्रकरणातील दोषींविषयी केलेल्या कथित वक्तव्याचा संदर्भ देत त्यांनी देशाच्या शिक्षणमंत्र्यांवर टीका केली. अशा प्रकारच्या भूमिकेमुळे देशाला चुकीचा संदेश जात असल्याचे ते म्हणाले. याचबरोबर त्यांनी सत्ताधारी पक्षावरही निशाणा साधत, त्यांच्या सरकारमध्ये गुन्हेगार आणि बलात्काराच्या आरोपींना समर्थन दिले जात असल्याचा आरोप केला. कुलदीप सेंगर आणि राम रहीम यांच्या संदर्भाचाही त्यांनी उल्लेख करत सरकारच्या भूमिकेवर प्रश्नचिन्ह उपस्थित केले.

आजचे जे झी तरुण उद्या देश चालवणारे असतील - अभिजीत दिपके 

कंगना राणावत यांच्याबाबत सुरू असलेल्या सोशल मीडियावरील चर्चेवरही अभिजीत दिपके यांनी प्रतिक्रिया दिली. सोशल मीडियावर काही जण समर्थन करत आहेत तर काही जण ट्रोल करत आहेत, अशा वातावरणात तरुणांना लक्ष्य करून ट्रोल करण्याचा कोणालाही फायदा होणार नाही, असे त्यांनी सांगितले. 15 ते 28 वर्षे वयोगटातील युवक हेच पुढे जाऊन देशाचे नागरिक, मतदार आणि भविष्यात देश चालवणारे असतील, त्यामुळे त्यांना राजकीय किंवा वैचारिक भूमिकांवरून लक्ष्य करणे योग्य नसल्याचे त्यांनी स्पष्ट केले. सामान्य कुटुंबातील तरुणांना ट्रोल करून समाजात नकारात्मक वातावरण निर्माण होत असल्याचेही त्यांनी नमूद केले.

नाशिक पोलिसांनी आंदोलनांच्या पार्श्वभूमीवर मोबाईल रेकॉर्डिंगसंदर्भात जारी केलेल्या एसओपीवरही दिपके यांनी आपली भूमिका मांडली. एखादी कृती रेकॉर्ड होण्याची भीती वाटत असेल तर संबंधितांनी स्वतःच्या वर्तनाचा विचार करावा, असे ते म्हणाले. त्यांच्या आंदोलनादरम्यान माध्यमांचे तसेच पोलिसांचे कॅमेरे सतत उपस्थित होते आणि त्याची कोणतीही भीती वाटली नसल्याचे त्यांनी सांगितले. पोलिसांनी एसओपी काढण्यापेक्षा संविधानाचे पालन करावे, अशी अपेक्षा त्यांनी व्यक्त केली. देशातील पोलीस हे कोणत्याही एका राजकीय पक्षाचे नसून संविधानानुसार काम करणारी यंत्रणा असल्याचे त्यांनी सांगितले. जर संविधानापेक्षा एखाद्या राजकीय पक्षाचे आदेश पाळायचे असतील, तर खाकी वर्दी घालण्याचा अधिकार नसल्याची टीकाही त्यांनी पत्रकार परिषदेत केली.