बारामतीसह महाराष्ट्रातील 3 नगरपालिकांसदर्भात निवडणूक आयोगाचा मोठा निर्णय, मतदानासाठी नव्या तारखा जाहीर

बारामती, फलटण व महाबळेश्वरची निवडणूक पुढे ढकलली

फलटण आणि महाबळेश्वर नगरपरिषदेसाठी अनुक्रमे 20 आणि 21 डिसेंबर रोजी मतदान घेण्यात येणार आहे. या दोन्ही नगरपालिकांशी संबंधित याचिका जिल्हा न्यायालयात दाखल असल्याने निकाल देण्यासाठी न्यायालयाने आठ दिवसांचा कालावधी घेतला आहे. त्यामुळे आयोगाने गोंधळ टाळण्यासाठी ही प्रक्रिया पुढे ढकलली. बारामती नगरपरिषदेतही अशाच प्रकारची परिस्थिती निर्माण झाली. उमेदवारी अर्ज भरण्याची मुदत दुपारी तीनपर्यंत होती, मात्र प्रक्रिया त्यापूर्वीच थांबवल्याचा आरोप झाला. तसेच काही उमेदवारांकडून अर्जासंबंधी त्रुटींवर हरकती नोंदवल्या गेल्या. न्यायालयाने भाजपच्या दोन उमेदवारांना मुदत संपल्यानंतरही अर्ज दाखल करण्याची परवानगी दिली होती. नगराध्यक्षपदाच्या उमेदवारांवरही काही आरोप असल्याने, न्यायालयीन प्रक्रियेचे अपील संपेपर्यंत निवडणूक स्थगित ठेवणे योग्य ठरेल, असा निर्णय निवडणूक आयोगाने घेतला.

बारामती निवडणूक 20 डिसेंबरला

बारामतीतील नगराध्यक्षपद आणि सात प्रभागांसंबंधीची याचिका सत्र न्यायालयाने फेटाळली असली तरी अपिलासाठीची मुदत संपलेली नसल्याने आयोगाने निवडणूक थांबवली आहे. आता बारामतीत देखील मतदान प्रक्रिया 20 डिसेंबरला पार पडेल. संबंधित सात जागांसह नगराध्यक्षपदासाठी उमेदवारांना आता आपल्या उमेदवारी मागे घेण्याची संधी मिळणार आहे.

नवीन कार्यक्रम जाहीर

नवीन निवडणूक कार्यक्रमानुसार:

4 डिसेंबर – नव्या निवडणूक कार्यक्रमाची घोषणा

10 डिसेंबर, दुपारी 3 वाजेपर्यंत – उमेदवारी अर्ज मागे घेण्याची अंतिम मुदत

11 डिसेंबर 2025 – अधिकृत उमेदवारांची अंतिम यादी जाहीर

20 डिसेंबर, संध्याकाळी 7.30 ते 5.30 – मतदान

21 डिसेंबर – मतमोजणी आणि निकाल

या तिन्ही नगरपालिकांत नव्याने उमेदवारी अर्ज दाखल करता येणार नाही. राज्यातील इतर नगरपरिषदांसाठी तयारी पूर्ण दरम्यान, राज्यातील इतर नगरपरिषद आणि नगरपंचायतींच्या निवडणुकीसाठी तयारी पूर्ण झाली आहे. 1 कोटी 7 लाख 3 हजार 576 मतदार मतदान करणार आहेत. 13,355 मतदान केंद्रांची व्यवस्था करण्यात आली आहे. ईव्हीएमसाठी 13,726 कंट्रोल युनिट व 27,452 बॅलेट युनिटची उपलब्धता आहे.

2 डिसेंबर रोजी होणाऱ्या या सार्वत्रिक निवडणुकीत 246 नगरपरिषदा आणि 42 नगरपंचायतींमध्ये अध्यक्ष पदांसह सदस्यपदे निवडली जाणार आहेत. मतदान सकाळी 7.30 ते सायंकाळी 5.30 पर्यंत होईल, तर मतमोजणी 3 डिसेंबरला सकाळी 10 वाजता सुरू होईल. राज्य निवडणूक आयोगाच्या निर्णयामुळे बारामती, फलटण आणि महाबळेश्वरमधील राजकीय समीकरणांना आता नवा कल मिळण्याची शक्यता वाढली आहे.

इतर महत्त्वाच्या बातम्या 

विधानसभेला आतून पाठिंबा देण्यासाठी रामभाऊ 35 कोटी देतो म्हणाला, फडणवीसांकडे घेऊन गेला : जयसिंह मोहिते पाटील