रक्तबंबाळ अवस्थेत 180 प्रवाशांना वाचवणाऱ्या भारतीय वैमानिकासाठी पीएम मोदींची पोस्ट, म्हणाले...

हेही वाचा : Maharashtra Weather: महाराष्ट्रात 1 ऑक्टोबरला पाऊस की ‘ऑक्टोबर हिट’? IMDचा अंदाज काय?

कॉकपिटचा दरवाजा उघडण्यात यशस्वी झाले अन् 

फ्लायदुबईचं FZ1073 हे विमान दुबईहून तेल अवीवला जात होतं. या विमानात 174 प्रवासी आणि क्रू सदस्य होते. बुधवारी विमान उड्डाणात असताना कॉकपिटमध्ये कॅप्टन आणि को-पायलटमध्ये हिंसक घटना घडली. यावेळी भारतीय कॅप्टन स्मित मच्छार यांच्यावर त्यांच्या ओमानी को-पायलटने चाकूने हल्ला केला. या हल्ल्यात मच्छार गंभीर जखमी झाले. त्यानंतर विमान अचानक वेगाने खाली येऊ लागलं. फ्लाइट ट्रॅकिंग डेटानुसार विमान काही वेळातच हजारो फूट खाली आलं. गंभीर जखमी असूनही मच्छार यांनी परिस्थिती हाताळण्याचा प्रयत्न सुरू ठेवला. ते कॉकपिटचा दरवाजा उघडण्यात यशस्वी झाले. त्यानंतर प्रवासी आणि क्रू सदस्य कॉकपिटपर्यंत पोहोचले आणि आरोपीला नियंत्रणात घेण्यास मदत केली. विमानातील इतर वैमानिकांनीही नियंत्रण मिळवण्यासाठी मदत केली. त्यानंतर विमान सौदी अरेबियातील तबूक विमानतळावर सुरक्षित उतरवण्यात आलं.

हेही वाचा : Personal Finance: Digital Gold मध्ये लाखो रुपये गुंतवले, पण तुमच्यानंतर हे सोने कुणाला मिळणार?

मोदींकडून कॅप्टन मच्छार यांच्या धाडसाचं कौतुक 

पंतप्रधान मोदी यांनी सोशल मीडिया पोस्टमध्ये कॅप्टन मच्छार यांच्या धाडसाचं कौतुक केलं. गंभीर धोका आणि मोठ्या दुखापतीनंतरही त्यांनी इतरांचे प्राण वाचवण्यासाठी धैर्य आणि दृढनिश्चय दाखवला, असं मोदी यांनी म्हटलं. भारताला कॅप्टन मच्छार यांचा अभिमान असल्याचंही त्यांनी सांगितलं आणि त्यांना लवकर बरे होण्यासाठी शुभेच्छा दिल्या. इस्रायलचे पंतप्रधान बेंजामिन नेतन्याहू यांनीही कॅप्टन मच्छार यांच्या धाडसाची प्रशंसा केली. गंभीर जखमी झाल्यानंतरही त्यांनी मुकाबला केला आणि त्यामुळे प्रवासी व क्रूला हल्लेखोराला रोखण्याची संधी मिळाली, असं नेतन्याहू यांनी म्हटलं. कॅप्टन स्मित मच्छार हे मूळचे गुजरातचे असून त्यांनी जवळपास 11 वर्षे स्पाइसजेटमध्ये काम केलं आहे. जून 2022 मध्ये ते फ्लायदुबईमध्ये दाखल झाले. ते बोईंग 737 विमान उडवतात. त्यांच्याकडे कमर्शियल एव्हिएशनचा 10 वर्षांहून अधिक अनुभव आहे. स्पाइसजेटमध्ये त्यांनी इतर पायलट्सना प्रशिक्षण आणि मार्गदर्शन देण्याचं कामही केलं आहे.