मिठी नदी सफाई घोटाळ्याप्रकरणी डिनो मोरियाला समन्स, प्रकरण काय? अभिनेता कसा अडकला?

हे ही वाचा >> एकनाथ शिंदेंना विलंब, पण बोर्डे कुटुंबासाठी ठरलं वरदान! किडनी ट्रान्सप्लांटसाठी कशी झाली मदत?

शुक्रवारी ईडीने मुंबई, कोच्ची आणि त्रिशूर येथील 18 ठिकाणांवर छापे टाकले होते. ईडीने 1.25 कोटी रुपयांची रोख रक्कम आणि मालमत्ता जप्त व सील केल्या. सूत्रांनुसार, डिनो आणि सेंटिनो मोरिया यांचे केतन कदम याच्याशी जवळचे संबंध असल्याचा दावा आहे. केतन कदम याला याप्रकरणी यापूर्वीच अटक करण्यात आली आहे. केतन कदम आणि जय जोशी यांच्यावर मिठी नदीच्या साफसफाईसाठी वापरल्या जाणाऱ्या 'सिल्ट पुशर' आणि 'अ‍ॅम्फिबियस पॉन्टून मशीन'सारख्या यंत्रांचा ठेकेदारांना भाडेतत्त्वावर पुरवठा केल्याचा आरोप आहे.

मिठी नदी सफाई प्रकरण काय? 

ही मनी लॉन्ड्रिंग तपासणी मुंबई पोलिसांच्या आर्थिक गुन्हे शाखेने (EOW) मे महिन्यात 13 जणांविरुद्ध नोंदवलेल्या FIR वर आधारित आहे. 2017 ते 2023 या कालावधीत मिठी नदीच्या साफसफाईच्या ठेक्यांमध्ये गैरव्यवहार झाल्याचा आरोप आहे. बीएमसी अधिकाऱ्यांनी निविदा प्रक्रिया विशिष्ट यंत्र पुरवठादाराला अनुकूल ठरेल अशा पद्धतीने हाताळून ठेकेदारांना लाभ मिळवून दिल्याचा दावा आहे.

हे ही वाचा >> घरात वाद झाला आणि मुलाने थेट आईलाच भोसकलं... नागपूरमधील चीड आणणारी घटना

प्रशांत रामगुड़े, भूपेंद्र पुरोहित, केतन कदम आणि इतर खासगी व्यक्तींनी संगनमताने एक "कार्टेल" तयार केलं असा ईडीचा आरोप आहे. याच कार्टेलने बीएमसीच्या निविदा प्रक्रियेवर प्रभाव टाकला आणि साफसफाईच्या कामांसाठी अवास्तव दराने पेमेंट मंजूर केलं. यामुळे ठेकेदार आणि त्यांच्याशी संबंधित व्यक्तींना अनुचित आर्थिक लाभ मिळाला, तर सरकारी तिजोरीचं नुकसान झालं. हा लाभ शेल कंपन्यांमार्फत लेयरिंग करून लपवण्यात आल्याचा ईडीचा आरोप आहे.

आतापर्यंतच्या कारवाईत ईडीने 7 लाख रुपये रोख, 22 बँक खाती, फिक्स्ड डिपॉझिट आणि एक डिमॅट खातं गोठवलं आहे. जप्त आणि गोठवलेल्या मालमत्तेची एकूण किंमत 1.25 कोटींहून अधिक असल्याचं सांगितलं जात आहे. डिनो मोरिया आणि त्यांच्या भावाला गेल्या महिन्यात मुंबई पोलिसांनीही चौकशीसाठी बोलावलं होतं. ईडीला संशय आहे की, डिनो आणि सेंटिनो यांचे केतन कदम आणि जय जोशी यांच्याशी आर्थिक व्यवहारांचे संबंध असू शकतात.

2005 च्या मुंबईतील महापुरानंतर मिठी नदीच्या साफसफाईचा प्रकल्प सुरू झाला होता, जेव्हा शहर पूर्णपणे ठप्प झालं होतं. तेव्हापासून आतापर्यंत नदीच्या साफसफाईबाबत अनेकदा भ्रष्टाचाराचे आरोप समोर आले आहेत.