उद्धव ठाकरेंच्या आमदारासाठी एकनाथ शिंदेंनी घेतली प्रचार सभा, राज्यात मोठ्या घडामोडी; नेमकं काय घडलं?

काय म्हणाले एकनाथ शिंदे?

एकनाथ शिंदे म्हणाले, दिलीप सोपल सात वेळेस निवडून आले. या विधानसभेला गाडी चुकली. नाहीतर ते मंत्रिमंडळात असले असते. त्यांचं विधानसभेतलं काम मी पाहिलेलं आहे. मी जवळून सोपल यांना अनुभवलंय. दोन वेळेस ते विधानसभेत नव्हते. पण त्यावेळेस विधानसभेलाही चुकल्यासारखं वाटायचं. सोपल हे अजातशत्रू आहेत, सगळ्यांचा मित्र आहे. आमदार कसा असावा? तर दिलीप सोपल यांचं नाव घ्यावं लागेल. अनुभवी आणि कलाकार माणूस आहे. म्हणून मी मुद्दाम या सभेला आलो. शेवटी आज एकीकडे दु:खाचं सावट आपल्यावर आहे. अजितदादांचं निधन झालं. महाराष्ट्रात शोककळा आहे आणि निवडणूक आहे. आमच्या निवडणुका झाल्या. ही कार्यकर्त्यांची निवडणूक आहे. कार्यकर्त्यांची अपेक्षा असते, नेत्याने आमच्यासाठी देखील यावं. मी त्यांच्या पाठिशी उभा राहणारा कार्यकर्ता आहे. दिलीप सोपल साहेब आणि माझी मैत्री जीवाभावाची आहे, त्यामुळेच मी इथं आलोय. 

पुढील काळात चूक दुरुस्त करुन सोपल 8 व्यांदा निवडून येतील, शिदेंकडून थेट ऑफर 

यावेळी एकनाथ शिंदेंनी वैराग तालुका निर्मिती आणि संतनाथ कारखाना सुरु करण्याचा आश्वासनही दिलं. स्थानिक विकासकामांना निधी देण्याचा वादा देखील केला. सोपल यांच्या नेतृत्वात उभारलेल्या सर्व उमेदवारांना विजयी करण्याचं आवाहन देखील त्यांनी केलं. शिवाय, एकनाथ शिंदेंनी दिलीप सोपलांना पुढील निवडणूक आमच्याकडून लढवण्याची ऑफर देखील दिली. आता सोपल पुढील काळात आठव्यांदा निवडून येतील. 100 टक्के निवडून येतील. मागच्या वेळेस झालेली चूक आपण दुरुस्त करु, असंही शिंदे यावेळी म्हणाले. 

दिलीप सोपल म्हणाले, बार्शीतील महाआघाडीच्या प्रचारासाठी शिंदे साहेब याठिकाणी आलेले आहेत. ही महाआघाडी आम्ही बार्शीतील विध्वंसक प्रवृत्तीविरोधात लढण्यासाठी निर्माण केली आहे. त्याची कल्पना देखील मी आपल्याला दिलेली होती. साहेब तुम्ही आलात, तालुक्याच्या आणि महाआघाडीच्या वतीने मी स्वागत करतो. हा तालुका विकासाभिमुख आहे. इथं काम करणाऱ्या माणसाच्या पाठिशी लोकं उभे राहातात. तालुक्यातील लोकांच्या तुमच्याकडून अपेक्षा आहेत. वैराग तालुका व्हावा, ही येथील जनतेची अनेक वर्षांची मागणी आहे. मंत्रिमंडळात हा विषय येईल, तेव्हा तुम्ही ती मंजूर करावी. जवळगाव धरणात पाणी सोडून मिळावं, अशी मागणी देखील सोपल यांनी केली. आपली ख्याती बोले तैसा चाले अशी आहे. मात्र, आम्ही तुमच्या खांद्यावर कामाचा डोंगर देत नाहीत. फक्त पाठिंबा आणि आशीर्वाद महाआघाडीच्या उमेदवारांना लाभावा, असंही सोपल म्हणाले. 

राजेंद्र राऊतांना रोखण्यासाठी सोपलांची स्ट्रॅटेजी 

बार्शी तालुक्यात भाजपचे माजी आमदार राजेंद्र राऊत यांनी नगरपरिषद आणि बाजार समिती निवडणुकांमध्ये मिळवले होते, त्यांची वाढती ताकद रोखण्यासाठी ही स्थानिक युती करण्यात आल्याची चर्चा होती. भाजपचा प्रभाव जिल्हा परिषद आणि पंचायत समितीवर वाढू नये, यासाठी दोन्ही शिवसेना आणि दोन्ही राष्ट्रवादी एकत्र येत भाजपविरोधात सामूहिक लढा उभारणार देत असल्याचे पाहायला मिळत आहेत.