“लाल किल्ल्यासारखा संवेदनशील परिसरात…”, शरद पवारांची मोदी-शाहांकडे ‘ही’ मागणी

शरद पवारांनी केली ‘ही’ मागणी

10 नोव्हेंबर रोजी सायंकाळी सुमारे सात वाजता i20 कारमध्ये स्फोट झाला, ज्यामुळे परिसरातील काही वाहने जळाली आणि काही पादचारी जखमी झाले. ही घटना लाल किल्ल्याजवळील संवेदनशील परिसरात घडल्याने सुरक्षा व्यवस्थेवर प्रश्नचिन्ह उपस्थित झाले आहे. दिल्ली पोलिस, राष्ट्रीय सुरक्षा रक्षक (NSG), राष्ट्रीय तपास संस्था (NIA) आणि इतर तपास यंत्रणांनी घटनास्थळी धाव घेतली असून, तपास सुरू आहे. या स्फोटात किमान आठ जणांचा मृत्यू झाला आहे.

शरद पवार यांचे ट्वीट

शरद पवार यांनी आपल्या ट्विटमध्ये या घटनेचे वर्णन "अतीव दुःखद" आणि "चिंताजनक" असे केले आहे. त्यांनी मृत्युमुखी पडलेल्या निष्पाप नागरिकांना भावपूर्ण श्रद्धांजली अर्पण केली असून, त्यांच्या कुटुंबीयांप्रती सहवेदना व्यक्त केल्या आहेत. तसेच, जखमींच्या लवकरात लवकर बरे होण्यासाठी प्रार्थना केली आहे. "लाल किल्ल्यासारख्या संवेदनशील परिसरात ही दुर्दैवी घटना घडणे फारच चिंताजनक आहे."

शरद पवार यांनी देशाचे पंतप्रधान नरेंद्र मोदी आणि केंद्रीय गृहमंत्री अमित शाह यांच्याकडे या प्रकरणाची सखोल चौकशी करण्याची मागणी केली आहे. त्यांनी अपेक्षा व्यक्त केली की, चौकशी अहवाल देशासमोर ठेवला जावा आणि त्यानुसार केंद्र व राज्य सरकारच्या यंत्रणांनी अशा घटना रोखण्यासाठी ठोस सुरक्षा उपाययोजना राबवाव्यात.

सरकारची प्रतिक्रिया

या घटनेनंतर पंतप्रधान नरेंद्र मोदी आणि केंद्रीय गृहमंत्री अमित शाह यांनी परिस्थितीचा आढावा घेतला आहे. अमित शाह यांनी दिल्ली पोलिस आयुक्त आणि इंटेलिजन्स ब्युरोच्या संचालकांशी संपर्क साधला असून, तपासाला वेग देण्याचे निर्देश दिले आहेत. घटनास्थळी एनएसजी आणि एनआयएच्या पथकांनी पोहोचून पुरावे गोळा करण्यास सुरुवात केली आहे. तसेच, देशातील बिहार, उत्तर प्रदेश, उत्तराखंड, पंजाब आणि महाराष्ट्रासारख्या राज्यांमध्येही सुरक्षा सतर्कता वाढवण्यात आली आहे.

या स्फोटानंतर परिसरातील नागरिकांमध्ये भीतीचे वातावरण पसरले आहे. एका प्रतक्षदर्शीच्या म्हणण्यानुसार, स्फोटानंतर रस्त्यावर मृतदेहांचे अवयव पडलेले दिसले, ज्यामुळे सर्वत्र हळहळ व्यक्त होत आहे. लोकांनी सोशल मीडियावर या घटनेच्या तपासाची मागणी जोरदारपणे केली असून, सुरक्षा व्यवस्थेवर प्रश्न उपस्थित केले आहेत.

दिल्ली पोलिस आणि केंद्रीय तपास यंत्रणांनी एकत्रितपणे या प्रकरणाचा तपास सुरू केला असून, स्फोटाचे कारण अजून स्पष्ट झालेले नाही. स्फोट हा दहशतवादी हल्ला असावा की अपघाती असावा, याबाबत शंका व्यक्त केली जात आहे.

ही घटना भारताच्या राजधानीतील सुरक्षा व्यवस्थेला आव्हान देणारी असून, पुढील काही तासांत तपासातून नवीन माहिती समोर येण्याची शक्यता आहे. शरद पवार यांनी या संवेदनशील मुद्यावरून सरकारवर दबाव वाढवला असून, या प्रकरणाची देशभरात चर्चा सुरू आहे.