नितेश राणेंना मोठा झटका, कणकवली अन् मालवण नगरपालिकेत पराभव; निलेश राणेंनी मैदान मारलं

मालवण नगरपरिषदेच्या एकूण 20 जागा आणि नगराध्यक्षपदासाठी झालेल्या निवडणुकीत शिंदे गटाच्या शिवसेनेने स्पष्ट वर्चस्व मिळवले आहे. नगराध्यक्ष पदावर शिवसेनेच्या ममता वराडकर यांनी विजय मिळवला असून शिंदे गटाने एकूण 10 जागांवर यश संपादन केले आहे. भाजपला 5 जागांवर समाधान मानावे लागले, तर शिवसेना (उद्धव बाळासाहेब ठाकरे) गटाला 4 जागा मिळाल्या आहेत. एका जागेवर अपक्ष उमेदवार विजयी झाला आहे. या निकालामुळे मालवणमध्ये निलेश राणेंचा प्रभाव अजूनही कायम असल्याचे स्पष्ट झाले आहे. महायुतीच्या उमेदवारांच्या विजयामुळे मालवणमध्ये सत्तास्थापनेचा मार्ग शिंदे गटासाठी सोपा झाला आहे.

दुसरीकडे कणकवली नगरपालिकेत अत्यंत अटीतटीची लढत पाहायला मिळाली. शहर विकास आघाडीचे उमेदवार संदेश पारकर यांनी अवघ्या 145 मतांच्या फरकाने विजय मिळवत भाजपला मोठा धक्का दिला आहे. एकूण जागावाटपात भाजपने 9 जागांवर विजय मिळवला असला, तरी शहर विकास आघाडीने 8 जागांवर यश संपादन करत भाजपला कडवी टक्कर दिली आहे. अत्यल्प मतफरकामुळे कणकवलीतील आगामी सत्तास्थापनेबाबत राजकीय हालचालींना वेग आला आहे.

या निकालांमुळे पालकमंत्री नितेश राणेंच्या नेतृत्वावर प्रश्नचिन्ह उपस्थित होत असून, कणकवली आणि मालवण या दोन्ही ठिकाणी त्यांना अपेक्षित यश मिळालेले नाही. विशेषतः कणकवलीत भाजपला स्पष्ट बहुमत न मिळाल्याने नितेश राणेंना हा मोठा राजकीय धक्का मानला जात आहे.

विजयानंतर संदेश पारकर यांनी कणकवलीकरांचे आभार मानत, या विजयात साथ दिलेल्या सर्व सहकाऱ्यांचे मनापासून अभिनंदन केले. तसेच मुख्यमंत्री एकनाथ शिंदे, उदय सामंत आणि आमदार नितेश राणे यांचे विशेष आभार व्यक्त केले. कणकवलीत नकारात्मक वातावरण दूर करून विकासाचे नवे पर्व सुरू होईल, असा विश्वास त्यांनी व्यक्त केला.

दरम्यान, मालवणमधील विजयाबद्दल निलेश राणे, दत्ता सामंत आणि त्यांच्या संपूर्ण टीमच्या मेहनतीचे कौतुक केले जात आहे. महायुतीच्या सर्व विजयी उमेदवारांचे अभिनंदन करत, येत्या काळात मालवण आणि कणकवलीच्या विकासाला गती देण्याचा निर्धार नेत्यांनी व्यक्त केला आहे.

इतर महत्त्वाच्या बातम्या 

Maharashtra Nagar Parishad Election Results 2025 Winner: तुमच्या नगर परिषदेचा नगराध्यक्ष कोण, पाहा संपूर्ण निकाल