MOTN 2024 : मोदींची लाट, काँग्रेस साफ; आज निवडणूक झाल्यास कुणाला किती जागा?

Mood of The Nation Uttar Pradesh opinion poll 2024 Lok Sabha 2024 Election : असं म्हणतात दिल्लीतील केंद्रीय सत्तेचा रस्ता उत्तर प्रदेशातून जातो. त्यामुळे ज्या पक्षाला दिल्लीतील सत्ता हवी असेल, त्यांना उत्तर प्रदेशचा पाठिंबा असायला हवा. आता लोकसभा २०२४ च्या निवडणुकीच्या अनुषंगाने उत्तर प्रदेशातील मतदारांचा मूड काय आहे, याबद्दल काही निष्कर्ष समोर आले आहेत. इंडिया टुडे-सी व्होटरने केलेल्या 'मूड ऑफ द नेशन'च्या पोलमधून उत्तर प्रदेशचा कौल  कुणाच्या बाजूने आहे, याबद्दल महत्त्वाची आकडेवारी समोर आली आहे. 

लोकसभा निवडणूक काही दिवसांवर आली आहे. या निवडणुकीच्या अनुषंगाने देशातील वातावरण कुणासाठी पोषक आहे, याचा धांडोळा घेणारं सर्वेक्षण इंडिया टुडे-सी व्होटरने केलं आहे. देशातील 543 लोकसभा मतदारसंघात जाऊन 1,49092 लोकांचे सर्वेक्षण करून निष्कर्ष काढण्यात आले आहेत. हे सर्वेक्षण 15 डिसेंबर ते 28 जानेवारी 2024 या कालावधीत करण्यात आले आहे. 

उत्तर प्रदेशातील जनतेचा कल काय?

2019 लोकसभा निवडणुकीत भाजपला सर्वाधिक जागा उत्तर प्रदेशात मिळाल्या होत्या. त्यामुळे यावेळी काय होणार, याकडे सगळ्यांचं लक्ष आहे. मूड ऑफ द नेशनच्या सर्वेक्षणामध्ये उत्तर प्रदेशचा कौल भाजपच्या दिशेने दिसत आहे. आज लोकसभा निवडणूक झाल्यास उत्तर प्रदेशात मोदी लाट दिसत आहे. 

उत्तर प्रदेशात मतांची टक्केवारी वाढणार

मूड ऑफ द नेशनच्या सर्वेक्षणानुसार, उत्तर प्रदेशातील 80 लोकसभा मतदारसंघात भाजपला 52.1 टक्के मते मिळवू शकतात. दुसरीकडे काँग्रेसला 5.5 टक्के, तर समाजवादी पार्टी 30.1 टक्के, बसपा 8.4 टक्के आणि इतरांना 3.9 टक्के मते मिळू शकतात, असा अंदाज आहे. 

Opinion Poll 2024 Uttar Pradesh : कुणाला किती जागा? 

जागांबद्दल बोलायचं झालं तर मूड ऑफ द नेशन सर्वेक्षणानुसार भाजपला 70 जागा मिळू शकतात. एनडीए दलाचा भाग असलेल्या अपना दलाला 2 जागा, तर समाजवादी पार्टीला 7 जागा, काँग्रेसला 1 जागा, तर बसपाला एकही जागा मिळणार नाही, असे अंदाज आहे. 

2019 मध्ये भाजपला मिळाले होते 50 टक्के मते

2019 मध्ये झालेल्या लोकसभा निवडणुकीत भाजपला 50 टक्के मते मिळाली होती. असं असलं, तरी 2014 च्या लोकसभा निवडणुकीच्या तुलनेत भाजपच्या जागा घटल्या होत्या. समाजवादी पार्टीला 18.11 टक्के, काँग्रेसला 6.36 टक्के मते मिळाली होती. 62 जागा भाजपने जिंकल्या होत्या. समाजवादी पार्टीने 5 जागा जिंकल्या होत्या. बसपाला 5 जागा मिळाल्या होत्या, तर अपना दल पार्टीला 2 आणि काँग्रेसला 1 जागा मिळाल्या होत्या. 2014 मध्ये भाजप प्रणित एनडीएने 70 जागा जिंकल्या होत्या.