मुंबईत महिला वोटर ठाकरे बंधूंना धक्का देणार? 53 टक्के परप्रांतीय महायुतीच्या बाजूने; पाहा असेंडिया कंपनीचा सर्व्हे

मुंबईतील महिला मतदार कोणाच्या बाजूने?

महिला मतदारांचा विचार केला असता, मुंबईतील 50 टक्के महिला मतदार भाजप आणि शिंदे गटाच्या महायुतीच्या बाजूने असल्याचं या सर्व्हेतून समोर आलं आहे. तर ठाकरे गट आणि मनसेच्या संभाव्य युतीला केवळ 22 टक्के महिला मतदारांचा पाठिंबा आहे. काँग्रेस आघाडीला 15 टक्के, तर इतर पक्षांना 13 टक्के महिला मतदार पसंती देत आहेत. महिला मतदारांमध्ये महायुतीला मिळणारा हा पाठिंबा ठाकरे बंधूंसाठी चिंतेचा विषय मानला जात आहे.

परप्रांतीय मतदार भाजपवर खुश

परप्रांतीय मतदारांच्या बाबतीत महायुतीला सर्वाधिक फायदा होताना दिसतो. गुजराती, उत्तर भारतीय आणि दक्षिण भारतीय अशा परप्रांतीय मतदारांपैकी 53 टक्के मतदार महायुतीच्या बाजूने असल्याचं सर्व्हे सांगतो. काँग्रेस-वंचित आघाडीला 19 टक्के परप्रांतीय मतदारांचा पाठिंबा असून ठाकरे गट आणि मनसे युतीला 15 टक्के मते मिळण्याची शक्यता आहे. उर्वरित 13 टक्के मतदार इतर पर्यायांकडे झुकलेले आहेत. त्यामुळे परप्रांतीय मतदार महायुतीचा मजबूत आधार ठरत असल्याचं चित्र आहे.

हेही वाचा : मुंबईत मराठी माणूस ठाकरे बंधूंना साथ देणार की महायुतीला? असेंडिया कंपनीचा सर्वात मोठा सर्व्हे समोर

44 टक्के मराठी मतदार ठाकरेंच्या बाजूने, महायुतीही मागे नाही

मराठी मतदारांमध्ये मात्र लढत अत्यंत चुरशीची आहे. 44 टक्के मराठी मतदार ठाकरे गट आणि मनसे युतीला मतदान करण्याची शक्यता व्यक्त करत आहेत. तर 42 टक्के मराठी मतदार भाजप आणि शिंदे गटाच्या महायुतीच्या बाजूने असल्याचं सर्व्हेत नमूद करण्यात आलं आहे. इतर पक्षांना 11 टक्के मराठी मतदारांचा पाठिंबा असून काँग्रेस आघाडीला केवळ 4 टक्के मराठी मते मिळण्याची शक्यता आहे. मराठी मतांमध्ये ठाकरे बंधूंना आघाडी असली तरी फरक अत्यल्प असल्याने शेवटच्या टप्प्यात चित्र बदलू शकतं.

41 टक्के मुस्लिम मतदारांचा कल काँग्रेसच्या बाजूने

मुस्लिम मतदारांमध्ये काँग्रेस आघाडी सर्वाधिक मजबूत असल्याचं या सर्व्हेतून स्पष्ट होत आहे. 41 टक्के मुस्लिम मतदार काँग्रेस आघाडीच्या बाजूने असल्याचं दिसत आहे. ठाकरे गट आणि मनसे युतीला 28 टक्के मुस्लिम मतदारांचा पाठिंबा असून 20 टक्के मतदार इतर पक्षांकडे झुकलेले आहेत. महायुतीला मात्र केवळ 11 टक्के मुस्लिम मतदारांचा पाठिंबा मिळत असल्याचं या सर्व्हेतून समोर आलं आहे.

असेंडिया कंपनीच्या या सर्व्हेनुसार मुंबईतील मतदारांचा कौल एकसंध नसून समाजघटकनिहाय विभागलेला दिसतो. महिला आणि परप्रांतीय मतदार महायुतीकडे झुकलेले असताना मराठी मतदारांमध्ये ठाकरे बंधूंची किंचित आघाडी आहे, तर मुस्लिम मतदार काँग्रेस आघाडीच्या बाजूने असल्याचं स्पष्ट होत आहे. त्यामुळे आगामी मुंबई महापालिका निवडणूक अत्यंत अटीतटीची ठरण्याची शक्यता वर्तवली जात आहे.

इतर महत्त्वाच्या बातम्या 

बायकोचा पराभव जिव्हारी अन् विजयी नगरसेविकेच्या पतीला सुपारी देऊन संपवलं; मंगेश काळोखे हत्या प्रकरणाचा उलगडा