कॅम्पमधला बंगला, तरूणींचं रॅकेट आणि... NCP नेत्याच्या राजीनाम्यामागची इनसाईड स्टोरी

हे ही वाचा >> पिंपरी चिंचवड हादरलं! चाकणमध्ये नाईट शिफ्टला निघालेल्या महिलेचा पाठलाग करुन केला अतिप्रसंग

दोन दिवसांपूर्वी पुणे पोलिसांनी मानकर यांच्याविरुद्ध 1 कोटी रुपयांच्या आर्थिक व्यवहारात बनावट कागदपत्रे सादर केल्याचा आरोप ठेवत गुन्हा दाखल केला. हा पैसा एका माजी एनसीपी पदाधिकाऱ्याशी संबंधित असल्याचं सांगितलं जातंय आणि तो नेता सध्या बलात्कार प्रकरणात अटकेत आहे. मानकर यांना अटक होऊ शकते, त्यामुळेच त्यांनी राजीनाम दिल्याची चर्चा आहे. त्यामुळे हा राष्ट्रवादीचा नेता कोण होता आणि त्याचं प्रकरण काय होतं असाही प्रश्न अनेकांना पडला आहे. 

कॅम्पमधील बंगल्याचं प्रकरण

पुण्यातील कॅम्पमधील एका बंगल्याच्या माध्यमातून परदेशी तरूणींचं सेक्स रॅकेट चालवलं जात होतं. काही लोक अलिशान गाड्यांमधून यायचे, या बंगल्याच्या बाहेर उभ्या तरूणी या गाडीत बसायच्या आणि जायच्या. हा सिलसिला अनेक दिवस सुरू दिसल्यानं काहींनी तक्रार केली. त्यावेळी पोलिसांसमोर तपासात एक नाव समोर आलं होतं. ते नाव होतं शंतनू कुकडे. पोलिसांना लक्षात येतं की हा आरोपी अजित पवार यांच्या राष्ट्रवादीचा पदाधिकारी आहे. पोलीस पुढे तपास करतात तेव्हा दीपक मानकर हे नाव समोर येतं. 

मानकर आणि कुकडेचं काय कनेक्शन? 

मानकर यांच्यासह या प्रकरणात FIR मध्ये आणखी दोन नावं आहेत. रौनक जैन आणि शंतनू कुकडे यांची ही नावं आहेत. कुकोडे हा सुद्धा आधी राष्ट्रवादी काँग्रेस पक्षाचा पदाधिकारी होता. तो त्याच्या एनजीओमार्फत परराज्यातील आणि परदेशातील मुलींना मदत देण्याच्या बहाण्याने एका महिलेवर आणि मुलीवर बलात्कार केल्याच्या आरोपाखाली आधीच न्यायालयीन कोठडीत आहेत.त्याच्यावर अनेक महिलांनी गंभीर आरोप केले आहेत. 

हे ही वाचा >> भारतात खळबळ उडवून देणारी Inside स्टोरी, पाकिस्तान दहशतवादी मसूद अझहरला देणार तब्बल 14 कोटी!

या प्रकरणात तपास करत असताना, पोलिसांना कुकडे, जैन आणि मानकर यांच्या बँक खात्यांशी संबंधित अनेक आर्थिक व्यवहार आढळले. पोलिसांना त्यांच्यावर संशय आला होता. 

सप्टेंबर ते ऑक्टोबर 2024 या कालावधीत रेड हाऊस फाउंडेशनच्या खात्यातून मानकर यांच्या खात्यात 1.18 कोटी रुपये हस्तांतरित करण्यात आल्याचं पोलिसांनी सांगितलं.

मानकर यांनी जैन जमिनीचा व्यवहार केल्याचं म्हटलं. जमीन व्यवहाराचे पुरावा म्हणून  स्टँप पेपरवर विक्री कराराचे कागदपत्रही सादर केले. मात्र, तपासणीत हे दस्तऐवज बनावट असल्याचं आढळलं, असं पोलिसांनी सांगितलं आहे. याच प्रकरणात मानकर यांच्यावर गुन्हा दाखल आहे. याच प्रकरणानंतर दीपक मानकर यांनी अखेर राजीनामा दिला. 

राजीनामा पत्रात पक्षातील योगदानाचा उल्लेख

मानकर यांनी राजीनामा पत्रात आपल्या पक्षातील दहा वर्षांच्या प्रवासाचा उल्लेख केला.  एनसीपीत प्रवेश केल्यानंतर त्यांनी 2014 मध्ये कसबा विधानसभा मतदारसंघासाठी उमेदवारी, नगरसेवक, उपमहापौर आणि शहराध्यक्ष अशी विविध पदे भूषवली. जुलै 2023 मध्ये राष्ट्रवादीत फूट पडल्यानंतर त्यांनी अजित पवार गटासोबत राहणे पसंत केलं आणि 6 जुलै 2023 रोजी पुणे शहराध्यक्षपदी नियुक्ती झाली. 

मानकर यांनी या पत्रात हे सुद्धा सांगितलं की, त्यांनी सुप्रीम कोर्टातील सुनावणीदरम्यान अजित पवार गटाच्या समर्थनार्थ 9500 हून अधिक शपथपत्रे गोळा केली. तसंच, पुण्यात पक्षाचा विस्तार करण्यासाठी 1500 हून अधिक पदाधिकारी नियुक्त केले आणि 200 हून अधिक सार्वजनिक कार्यक्रमांचं आयोजन केलं. याशिवाय, पुण्यात एक लाख पक्ष सदस्य नोंदणीचं उद्दिष्ट ठेवल्याचंही त्यांनी या पत्रात नमूद केलंय.

आरोपांचा इन्कार, राजकीय षड्यंत्राचा दावा

मानकर यांनी फसवणुकीच्या आरोपांचा पूर्णपणे इन्कार केला आहे. त्यांनी सांगितलंय की, हा व्यवहार त्यांच्या वैयक्तिक मालमत्तेशी संबंधित असून तो पूर्णपणे कायदेशीर आहे. आगामी महापालिका निवडणुकांच्या पार्श्वभूमीवर माझी प्रतिमा मलीन करण्यासाठी काही सामाजिक घटकांनी हे षड्यंत्र रचल्याचा आरोप त्यांनी केला. “माझ्या वाढत्या लोकप्रियतेमुळे मला राजकीयदृष्ट्या बदनाम करण्याचा प्रयत्न होत आहे,” असं त्यांनी पत्रात लिहिलं. या प्रकरणामुळे पक्षाची प्रतिमा मलिन होत असल्याची खंत व्यक्त करत त्यांनी राजीनामा देण्याचा निर्णय घेतला असं ते म्हणाले. 
  
दरम्यान, महापालिका निवडणुकीच्या तयारीत असलेल्या पुणे एनसीपीसाठी हे प्रकरण आणि मंकर यांचा राजीनामा पक्षाच्या स्थानिक पातळीवरील स्थानाला धक्का देणारे ठरू शकते. या घडामोडींचा पक्षाच्या भवितव्यावर काय परिणाम होतो, हे येत्या काळात स्पष्ट होईल.