NCP च्या आणखी एका नेत्याची विकेट, खरातची साथ सोबत भोवली... रुपाली चाकणकरांनी अखेर दिला राजीनामा

मी. सौ. रुपाली निलेश चाकणकर, वरील विषयान्वये आपणांस विनंतीपूर्वक कळवू इच्छिते की, 15 ऑक्टोबर 2024 रोजी माझी महाराष्ट्र राज्य महिला आयोगाची अध्यक्षा म्हणून नियुक्ती झाली होती. माझ्या वैयक्तिक कारणाने मी स्वेच्छेने सदर पदाचा राजीनामा ह्या पत्राद्वारे आपणांस सादर करत आहे.

आजवर माझ्यावर विश्वास दाखवून आपण मला सर्वतोपरी सहकार्य केले त्याबद्दल मी आपली व सर्व सहकाऱ्यांची शतश: ऋणी आहे. भविष्यातही आपले असेच सहकार्य राहील असा मला विश्वास आहे. 

तरी आपण माझा अध्यक्षा, राज्य महिला आयोग ह्या पदाचा राजीनामा स्वीकारावा अशी आपणांस नम्र विनंती आहे.

प्रकरणाची पार्श्वभूमी

नाशिक क्राइम ब्रांचने अशोक खरात याला बलात्कार, फसवणूक आणि महिलांचा लैंगिक शोषणाच्या आरोपाखाली अटक केली. खरात याच्या कार्यालयातून 58 आक्षेपार्ह व्हिडीओ जप्त झाले असून, SIT (विशेष तपास पथक) तेजस्विनी सातपुते यांच्या नेतृत्वाखाली तपास सुरू आहे. सोशल मीडियावर व्हायरल झालेल्या फोटो आणि व्हिडीओत रूपाली चाकणकर यांनी खरात यांच्या पाद्यपूजा केल्याचे, छत्री धरल्याचे आणि विविध कार्यक्रमात एकत्र दिसल्याचे दिसते. खरात यांच्या श्री शिवनिका संस्थान ट्रस्टमध्ये चाकणकर विश्वस्त होत्या. या सगळ्या गोष्टींमुळे रुपाली चाकणकर या विरोधकांच्या निशाण्यावर आल्या होत्या. अखेर आज त्यांना आपलं पदही गमवावं लागलं.

हे ही वाचा>> अशोक खरातच्या लैंगिक संबंधाच्या 58 Video Clips, 'ही' Inside Story तुम्हालाही टाकेल हादरवून

दुसरीकडे सामाजिक कार्यकर्त्या अंजली दमानिया यांनी 24 तासांत रुपाली चाकणकर यांचा राजीनामा न झाल्यास मंत्रालयासमोर उपोषण आणि राज्यव्यापी आंदोलनाचा इशारा दिला होता. मुंबई, पुणे, नाशिकसह राज्यभरात विविध महिला नेत्यांनी आंदोलनांनी दबाव वाढवला होता.

चाकणकर यांचे पूर्वीचे स्पष्टीकरण

दरम्यान, रुपाली चाकणकर यांनी या प्रकरणी एक्सवरून आपली बाजू मांडताना म्हटले होते की, 'खरात यांच्याशी फक्त सामाजिक आणि धार्मिक कार्यासाठी संबंध होते. गुन्ह्यांची माहिती नव्हती. तपास निष्पक्ष होईल यावर विश्वास आहे.'

मात्र, वाढत्या राजकीय दबावामुळे आज त्यांना राजीनामा देणे अपरिहार्य झाले. रुपाली चाकणकर यांचा राजीनामा स्वीकारल्यानंतर नव्या अध्यक्षाची नियुक्ती लवकरच होण्याची शक्यता आहे. प्रकरणाची SIT चौकशी सुरू असून, अधिक महिलांच्या तक्रारी समोर येण्याची शक्यता वर्तवली जात आहे.