Pune: मंत्री मुरलीधर मोहोळांनी 'ती' पोस्ट शेअर करताच रोहित पवार संतापले, थेट सुनावलं!

मुरलीधर मोहोळांनी सोशल मीडियावर पंतप्रधान नरेंद्र मोदी आणि भाजपचा उदो उदो केलाय. त्यांनी पोस्टमध्ये लिहिलं की, पंतप्रधान नरेंद्र मोदी यांच्या एनडीएफ सरकारच्या कार्यकाळात ज्यावेळी दहशतवादी हल्ले करण्यात आले. त्यावेळी भारताकडून जोरदार प्रत्युत्तर देण्यात आलं. मात्र, काँग्रेस सरकार असताना असं झालं नाही, अशा अर्थाची पोस्ट मुरलीधर मोहोळांनी केलीय. यावरून आता रोहित पवारांनी प्रत्युत्तरात ही राजकारण करण्याची  वेळ नसून देशासोबत मजबूत स्थितीत उभं राहण्याची वेळ असल्याचं पोस्टद्वारे प्रत्युत्तर दिलंय. 

मुरलीधर मोहोळांची पोस्ट

पोस्टमध्ये एक तक्ता अधोरेखित करण्यात आलाय. ज्यात नमूद केलंय की, काँग्रेस सरकारच्या काळात 1993 च्या मुंबई बॉम्बस्फोट, दिल्ली साखळी बॉम्ब स्फोट 2005, तर  मुंबईच्या 26/11 या दहशतवादी हल्ल्यात काँग्रेस कसं अपयशी झालं, अशी पोस्ट त्यांनी केलीय. 

तर दुसऱ्या बाजूच्या तक्त्यात नरेंद्र मोदी सरकारच्या काळात पाकिस्तानचे हल्ले आणि सर्जिकल स्ट्राईक करण्यात कसं यश मिळवतंय, अशी पोस्ट तक्त्याद्वारे शेअर करण्यात आलीय. त्यावर आता रोहित पवारांनी प्रत्युत्तरात सोशल मीडियावर एक पोस्ट शेअर करत मोहोळांना खडे बोल सुनावलंय. 

रोहित पवारांनी सुनावलं

मा. मोहोळ साहेब, आज संपूर्ण देश, सत्ताधारी–विरोधी असे सर्व राजकीय पक्ष सरकारसोबत, सैन्यासोबत उभे आहेत, कारण हा विषय राजकीय नाही तर देशाच्या स्वाभिमानाचा आणि सुरक्षेचा आहे. आपण एक जबाबदार मंत्री आहात, त्यामुळं किमान सध्याला तरी अशा पोस्ट करणे सयुंक्तिक वाटत नाही. राजकीय चर्चा नंतरही करता येतील कारण ही ती वेळ नाही. ही वेळ आहे देशाच्या शत्रूला धडा शिकवण्याची… त्यामुळं राजकारण बाजूला ठेवूया आणि हातात हात घेऊन भारतीय म्हणून सीमेवर लढणाऱ्या सैन्यासोबत आणि सरकारसोबत भक्कमपणे उभे राहूया!, असं पोस्टद्वारे सुनावलंय.